Ўз-ўзини яккалаш режимида бир оила аъзолари учун COVID-19’ни юқтириб олиш хавфи улар жамоат транспортидан фойдаланадиган ҳолатдан кўра анча юқори. Бу ҳақда хитойлик олимлар тадқиқотида айтилади, деб ёзади «РБК».
Олимлар Хитойнинг Хунань провинциясидаги 1178 нафар бемор ҳақидаги маълумотларни таҳлил қилиб чиқди. У 2019 йил охирида коронавирус тарқалиш ўчоғига айланган Ухань шаҳри маъмурий маркази бўлган Хубэй провинцияси билан чегарадошдир.
Касалликни юқтириш хавфи энг паст бўлган жой ҳимоя чоралари қўлланилувчи тиббий муассасалар бўлиб чиқди. Контактларнинг қанчалик яқинлигига қараб хавф даражаси ўсиб боради. Хавф жамоат транспортида, умумий овқатланиш муассасаларида ва кўнгилочар жойларда пастроқ бўлган бўлса, қариндошларнинг кенг доираси билан мулоқотда юқорироқ бўлиб чиқди.
Коронавирусни юқтириб олиш хавфи битта жойда яшайдиган оилада энг юқорилиги маълум бўлди. Бунга, эҳтимол, ўз-ўзини яккалаш чоғида улар бир-бири билан кўпроқ мулоқот қилиши сабаб бўлган, деган фикрда олимлар.
Аъзоларидан бири COVID-19’га чалинган оила қанча узоқ вақт бир жойда бўлса, юқтириб олиш хавфи шунчалик юқори бўлади. Касалланган одам билан бир уйда ўтказилган ҳар бир кун вирусни юқтириш эҳтимолини 10 фоизга оширади, дейилади тадқиқотда.
Изоҳ (0)