АҚШнинг собиқ президентлари Барак Обама, Жорж Буш ва Билл Клинтон камера қаршисида коронавирусга қарши вакцина билан эмланиб, жамоатчиликнинг хавфсизликка бўлган ишончини оширишга тайёрлигини билдирди. Буни АҚШ озиқ-овқатлар ва дорилар сифати устидан санитар назорат бошқармаси (FDA) вакцинадан фойдаланишга рухсат берганидан сўнг амалга ошириш мумкин, деб хабар беради CNN.
Буш администрациясининг раҳбари Фредди Форднинг сўзларига кўра, 43-президент Аллергия ва инфекцион касалликлар Миллий институти директори Энтони Фаучи ва Оқ уйнинг коронавирус бўйича координатори Дебора Бирксга мурожаат қилиб, вакцинанинг тарғиботида қандай қилиб ёрдам кўрсата олиши мумкинлигини сўраган.
«Бир неча ҳафта олдин президент Буш доктор Фаучи ва Бирксга вақти келганида у ватандошларига эмлашда ёрдам бериш учун ҳамма нарсани қилишга тайёрлигини етказишимни сўради. Биринчидан, вакциналар хавфсиз бўлиши ва аҳолининг алоҳида гуруҳларига қилиниши керак. Шундан сўнг президент Буш вакцина учун навбатга туриб, уни хурсандчилик билан камера қаршисида олишга тайёр», — дейди Форд.
Клинтоннинг матбуот котиби Анхель Урен эса собиқ президент ҳам жамоатчилик кўз ўнгида вакцинани қабул қилишга тайёрлигини билдирган.
Барак Обама эса SiriusXM радиосига берган интервьюсида эмлашдан ўтиш режалари ҳақида ўзи сўзлаб берган. «Мен ўзим ишлаган ва билган Энтони Фаучи каби инсонларга тўлиқ ишонаман. Агарда Фаучи менга вакцина хавфсиз ва коронавирусга қарши эмланиш мумкин деса, мен шубҳасиз, бу ишни қиламан», — дейди собиқ президент.
Аввалроқ Pfizer ва BioNTech ўзининг BNT1622б вакцинаси тадқиқотларнинг учинчи босқичи якунлари бўйича 95 фоиз самарадорлик кўрсатганини маълум қилганди. Таққослаш учун: Россиянинг «Спутник V» вакцинаси самарадорлиги ўз ишлаб чиқувчилари томонидан 92 фоизга, Америка Moderna компанияси вакцинаси 94,1 фоизга, AstraZeneca компанияси вакцинаси 70 фоизга баҳоланган.
Pfizer ва BioNTech вакцинани АҚШда ҳамда Евроиттифоқда рўйхатдан ўтказиш учун ариза берган.
Изоҳ (0)