Хитойнинг «Чанъэ-5» аппарати Ойга муваффақиятли қўнди. У 44 йил ичида биринчи марта Ойдан тупроқ намунасини Ерга олиб келади

Хитойнинг «Чанъэ-5» космик аппарати Ой юзасида муваффақиятли қўнишни амалга оширди. Бу ҳақда Meduza хабар берди.

Қўниш 1 декабрь куни Тошкент вақти билан соат 20:15 да Ойнинг Ерга кўринадиган томонининг ғарбий қисмидаги Бур океанининг Рюмкер чўққиси ҳудудида амалга ошди.

Мазкур миссиянинг мақсади Ойдаги тупроқ намунасини олиш, бу вазифани бажариш учун Ой юзасидаги модулнинг 48 соат вақти бор. Кейин эса учиш аппарати тахминан икки килограмм тупроқни ўз ичига олган капсулани орбитадаги модулга олиб чиқади. Орбитадаги модул эса Ерга қайтиб келади.

Миссия муваффақиятли амалга ошган тақдирда Хитой АҚШ ва СССРдан кейин Ой юзасидан Ерга тупроқ олиб келган дунёдаги учинчи мамлакат бўлади. Ой тупроғини Ерга олиб келиш бўйича охирги миссия 1976 йилда амалга оширилган.

Эслатиб ўтамиз, Хитой Ойни тадқиқ этиш учун «Чанъэ-5» зонди ортилган «Чaнчжэн-5» ракетасини 25 ноябрь куни муваффақиятли учирганди. 30 ноябрь куни «Чанъэ-5» Ойга қўниш бўйича тайёргарликни бошлагани ҳақида хабар берилганди.