ОАВ эронлик ядрошуноснинг ўлдирилиши билан боғлиқ тафсилотларни маълум қилди

Ғарб ОАВлари томонидан Эрон ядро дастури раҳбари деб аталган ядрошунос олим Муҳсин Фахризода масофадан бошқарилган қурол орқали ўлдирилган. Бу ҳақда Эроннинг Fars янгиликлар агентлиги хабар берди, деб ёзади «РБК».

Қотиллик 27 ноябрь куни эрталаб, Фахризода рафиқаси билан бирга Эрон шимолидаги Мазендеран вилоятида жойлашган Ростамкола шаҳридан чиқиб, Абсард аҳоли пунктига қараб йўл олганида содир этилган, деб ёзади Fars. Олим зирҳли автомобилда бўлган, унга ўз соқчилари хизматининг учта машинаси ҳамроҳлик қилган. Машиналардан бири олдинга чиқиб, вазиятни текшириш учун узоқлашиб кетган. Шу пайт Фахризоданинг автомобилига бир нечта ўқ келиб теккан, олим эса машина нимагадир тўқнашди ёки двигатель билан муаммо юзага келди, деб ўйлаб, машинадан чиққан. Шундан кейин олимнинг автомобилидан 150 метр узоқликдаги Nissan машинасидан масофадан туриб бошқарилган автоматик ўқотар қуролдан ўт очилган.

Fars маълумотларига кўра, иккита ўқ Фахризоданинг ёнбошига, биттаси белига теккан, оқибатда орқа мия шикастланган. Олимни тансоқчиси ўз танаси билан тўсган, унга ҳам бир нечта ўқ теккан. Шундан сўнг Nissan портлаб кетган. Қотиллик содир этилган жойда эр-хотин Фахризода ва соқчилардан бошқа ҳеч ким бўлмаган, деб ёзади агентлик. Ўқ отилган Nissan эгаси 29 октябрь куни мамлакатдан чиқиб кетган.

Қотиллик юз берган куни воқеа жойида камида бир марта портлаш овози эшитилгани, кейин эса Фахризоданинг машинаси ўққа тутилгани хабар берилган эди. Олим касалхонага олиб борилган, у ерда вафот этган.

Эрон ҳукумати Фахризоданинг ўлдирилишига кескин муносабат билдирди. Эрон олий етакчиси маслаҳатчиси Ҳусайн Деҳқон қотилликда айбдорларга қатъий жавоб чораси кўрилишини айтди ва тўлиқ кўламда уруш бошлаш мақсадида Эронга босимни кучайтиришга ҳаракат қилишаётганини маълум қилди. Мамлакат ташқи ишлар вазири Жавод Зариф халқаро ҳамжамиятни «давлат террор акти»ни қоралашга чақирди ва қотилликка Исроил алоқадор бўлиши мумкинлигини айтди. Кейинроқ The New York Times газетаси ўз манбаларига таяниб, АҚШ разведка хизматлари ҳам шундай версия тарафдори эканлиги ҳақида хабар берди. Агентлик ҳамсуҳбатларига кўра, Фахризода узоқ вақт давомида Исроилнинг «Моссад» сиёсий разведкаси нишони бўлиб келган. Оқ уй ва МРБ бу масала бўйича газетага изоҳ беришдан бош тортди.

Фахризода Эрон ядро дастурининг етакчи ишлаб чиқарувчилардан бири эди, 2018 йилда Исроил бош вазири Бинямин Нетаньяху олимни Теҳроннинг барча ядро лойиҳасининг раҳбари эканлигини айтган. ОАВлар уни «Эронлик Оппенгеймер» ва «Эрон бомбасининг отаси» деб атаган. Қайд этиш жоизки, Эронда ядро қуроли ҳозирча яратилмаган.