Байден ит билан ўйнаш вақтида оёғини шикастлаб олди. Трамп унга соғлик тилади

Американинг энг йирик ОАВлари томонидан АҚШнинг сайланган президенти дея эътироф этилаётган Жо Байден ити билан югуриб ўйнаётиб, тойиб кетди ва оёғини қайириб олди. Бу ҳақда унинг офисидан хабар беришди, деб ёзади «РБК».

Байденнинг офиси тарқатган баёнотда айтилишича, ҳодиса 28 ноябрь, шанба куни юз берган. «Эҳтиёткорлик юзасидан» 78 ёшли демократ шифокор кўригидан ўтди.

Байденнинг кортежи Делавер штати Нюарк шаҳридаги ортопеднинг ҳузурига келган. Кортежга журналистлар ҳамроҳлик қилган, аммо уларнинг микроавтобусдан чиқишларига йўл қўйилмаган, шу сабабли улар Байденнинг бинога кириб кетаётганини кўрмаган.

Компьютер томографияси Жо Байденнинг оёғи икки жойидан дарз кетганини кўрсатди. Шифокорнинг сўзларига кўра, дастлаб рентген сурати суяк синганини кўрсатмаган. Аммо компьютер томографияси  ён ва ўрта понасимон суяклардаги кичик ёриқларни тасдиқлаган.

Жо Байденнинг даволовчи шифокори Кевин ЎКоннорнинг айтишича, демократ бир неча ҳафта давомида махсус оёқ кийимда ухлашига тўғри келади.

Кейинроқ амалдаги АҚШ президенти Дональд Трамп ўз рақибига тезроқ соғайиб кетишни тилади. «Тезроқ тузалиб кетди», — деб ёзди Трамп Twitter’да Байденнинг Делавердаги касалхонадан чиқиши акс этган видеога изоҳ сифатида.

Аввалроқ АҚШ президенти Дональд Трамп 2024 йилги президент сайловларида ўз номзодини илгари суриш имкониятини кўриб чиқаётганлиги ва 20 январь — янги президентнинг инаугурацияси куни шу билан боғлиқ тадбир ўтказиши мумкинлиги хабар берилган эди.

Эслатиб ўтамиз, АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади ва сайлов бўйича судга мурожаат қилишини билдирди. У сайловлар қонунбузарликлар билан ўтган деган фикрда, шунингдек, сайловларда мамлакат конституцияси бузилганини айтган.

Кейинроқ Дональд Трамп маъмурияти Жо Байденга ҳокимиятни топширишга тайёрлигини билдирган эди. Шундан кейин Байден ўз маъмуриятининг асосий аъзоларини шахсан таништирди. Шунингдек, демократ Жозеф Байденга разведка томонидан давлат раҳбари учун тайёрланадиган кунлик махфий ҳисоботларни тақдим этишга рухсат берилди.