Уйда тайёрлаган пиццангиз ҳақиқий италянча бўлиши учун 5 тавсия

Ҳар бир бекажон уй шароитида италян ресторанидаги каби пицца тайёрлашни истаса керак. Аслида уларнинг сири хамир рецепти ёки маҳсулотларда эмас. Бунинг учун бор-йўғи бир нечта қоидаларга амал қилиш талаб этилади.

Юқори ҳароратда пишириш

Кўпчилик пиццани 40 дақиқа давомида 180 даража ҳароратда пишириш керак, деб ўйлайди. Афсуски, бу билан кутилган натижага эришиб бўлмайди. Ўртача ҳароратда маҳсулотлар таъм ва ҳидини йўқотади. Бунинг олдини олиш учун энг юқори ҳарорат танланиб, пицца 15-20 дақиқада пишириб олинади.

Пицца хамирини қўл билан ёйиш

Гап шундаки, хамир нафас олиши керак. Уни жўва ёрдамида ёйганда хамир текисланиб, зичлашади. Натижада пицца хамири қаттиқ бўлиб пишади. Бунинг учун хамир керакли шаклга келгунига қадар қўллар ёрдамида аста-секин ёйиш тавсия этилади. Шундан сўнг унинг устини керакли маҳсулотлар билан безатиш мумкин.

Камроқ начинка қўшиш

Одатда музлаткичда бор маҳсулотдан начинка сифатида фойдаланилади. Биринчидан, начинка остида қолган хамир яққол сезилиши керак. Иккинчидан, агар начинка меъёридан ортиқ бўлса, унинг оғирлиги туфайли хамир пишиш жараёнида кўтарила олмайди. Натижада пицца хамири яна қаттиқ бўлиб пишади.

Моцарелла пишлоғи ва райҳон

Ушбу комбинация ҳар қандай пиццани чиндан ҳам италянчага айлантиради. Райҳон егуликка ўзгача хушбўй ҳид берса, моцарелла пишлоғи эса эриб, ёпишқоқлиги даражаси билан кутилган маза ва натижани бериши шубҳасиз.

Табиий помидор соуси

Италянча пицца тайёрлашни истаганлар майонез ва кетчуп каби соуслардан фойдаланиши қатъиян ман этилади. Бу егулик таъмини бузади. Энг мақбул соус сифатида фақатгина зайтун мойи ва туз қўшилган помидор соусидан фойдаланиш керак.