Уйқусизликдан шикоят қилувчилар ётишдан аввал амалга ошираётган хатти-ҳаракатларини назорат қилиши керак. Қуйидаги 10 та машғулот ухлашга ётишдан аввал вақт ўтказиш учун энг ёмон ғоялардир.
Уйқусиз ҳаёт кечириш қийин, айниқса, кундузи ишлаш, ўқиш ва яқинларга эътибор бериш керак. Уйқу пайтида жисмоний ва ҳиссий жиҳатдан ҳам организм тикланади. Агар инсон тонгда ўзини хотиржам ва кучга тўла ҳис қилмаса, демак, бу уйқунинг сифатсизлигини кўрсатади. Уйқу сифатига кўплаб омиллар таъсир қилиши мумкин – кун тартиби, соғлиқ ҳолати ва ётишдан аввалги машғулотлар. Энг ёмони эса ётишдан аввалги хатти-ҳаракатлардир, чунки улар уйқунинг сифатига салбий таъсир кўрсатиши аниқ.
Кўп суюқлик ичиш
Кўпчилик кун давомида камида 8 стакан сув ичиши кераклигини билади, бу ҳақиқат. Аммо кунига 6 стакан суюқлик қабул қилиниб, қолган миқдорни ётишдан аввал ичиш яхши фикр эмас. Ётишдан аввал кўп миқдорда сув ичиш туфайли ярим тунда уйғонишга тўғри келади ва эртаси куни юз ёки танада шиш пайдо бўлиши мумкин.
Қийин ҳазм бўладиган овқат истеъмол қилиш
Аслида ётишдан аввал овқатланиш мумкин. Ҳаттоки озишни истайдиганлар ҳам. Аммо озиқ-овқат енгил, кам ёғли ва паст калорияли бўлиши керак. Узоқ муддатда ҳазм бўладиган овқатларни ётишдан камида 4 соат аввал тановул қилиш керак. Сабаби организмнинг горизонтал ҳолатида ҳазм қилиш тизими тўлиқ ишлай олмайди. Ётишдан аввал оғир таомларни истеъмол қилиш эса ошқозон бузилишига олиб келади.
Кофеин қабул қилиш
Бу асаб тизими учун кучли стимулятор бўлиб, у қувватни фаоллаштириш учун керак бўлади. Ётишдан аввал қаҳва ичиш одати уйқуни қочиришга олиб келади. Сабаби кофеин ухлаб қолишнинг олдини олади. Шуни ёдда тутиш керакки, кофеин нафақат қаҳва ва қора чойда, балки энергетик ичимлик ва шоколад таркибида ҳам бўлади.
Ухлатувчи таблеткаларни қабул қилиш
Уйқусизликда дори воситаларини кўпинча шифокорлар тавсия қилади. Аммо узоқ вақт уларни қабул қилмаслик керак. Уйқу таблеткаларини мунтазам қабул қилиш, уларга муҳтожликни ва бунинг ортидан ножўя таъсирлар намоён бўлишига олиб келади.
Спиртли ичимликлар ичиш
Спиртли ичимлик ичиб ётиш ҳам худди кофеинга ўхшайди. Уйқуда инсон мияси кун давомида олинган маълумотларни тизимлаштиради. Бунга эса оз миқдордаги спиртли ичимлик ҳам халақит беради ва хотирани сусайтиради.
Видеоўйинлар ўйнаш
Бўш вақтда кўпчилик смартфон ёки компьютерда ўйин ўйнашни ёқтиради. Бу дам олишнинг яхши усули, аммо бу уйқудан аввалги вақтга тўғри келмаган бўлса. Ўйин миянинг барча манбаларини ўз ичига олади ва шундан сўнг тинчланиш ҳамда ухлаш қийин бўлади. Бундан ташқари, одамлар кўпинча ўйин ўйнаш вақтида ухлашга мўлжалланган соатларни йўқотади.
Ижтимоий тармоқларда вақт ўтказиш
Шунчаки бир неча дақиқага ижтимоий тармоққа кириш орқали соатлаб вақт ўғирлаганини сезмай қолиш мумкин. Смартфон экрани ёки монитордан тушаётган нур эса уйқу ҳолатига таъсир қилади. Шунинг учун ётишдан аввал электрон қурилмалардан фойдаланишни тўхтатган афзал.
Иш масалаларини ҳал қилиш
Агар иш шошилинч ечимни талаб этмаса, уни эрталабга қолдирган маъқул. Иш ҳақида ўйлаш тинчланмаслик ва уйқуни чалғитишдир. Шунинг учун ётишдан аввал электрон почтани текширмаслик ва хабарларга жавоб ёзмаслик тавсия этилади.
Даҳшатли фильм томоша қилиш
Даҳшатли фильмлар одамда биринчи навбатда қўрқувни пайдо қилиш учун ишлаб чиқарилади. Агар ётишдан аввал улар томоша қилинса, нафақат уйқу сифати, балки руҳият ҳам зарар кўради. Салбий оқибатлар хавотирнинг кучайиши, қўрқувнинг пайдо бўлиши ва ваҳима уйғотади.
Жисмоний машқлар бажариш
Спорт билан шуғулланиш мақтовга сазовор иш. Аммо ётишдан аввал шуғулланиш яхши вақт эмас. Сабаби тана жисмоний ишдан уйқу ҳолатига ўтиши учун бир қанча муддат талаб этади. Шунинг учун машғулотларни ётишдан камида уч соат аввал амалга ошириш тавсия этилади.
Изоҳ (0)