Сиз ва фарзандингиз учун хавфли бўлган уйдаги нарсалар

Бир қарашда зарарсиздек туюлган уй жиҳоз ва буюмлари саломатлик ва ҳаёт учун хавфли бўлиши мумкин.

Ҳаво тозалайдиган воситалар

Деярли барча ҳавони тозалайдиган ароматизаторлар таркибида учувчи органик бирикмалар бўлади. Ушбу органик бирикмалар даражасининг кўплиги бурун, томоқ ва кўз шиллиқ қаватлари ҳамда нафас йўллари учун зарарли ҳисобланади, қолаверса, аллергик реакцияларга ҳам сабаб бўлади. Тадқиқотларда ушбу воситалардан мунтазам фойдаланиш онкологик касалликларга чалиниш хавфини ортишига сабаб бўлиши аниқланган.

Намлантирувчи воситалар

Иссиқлик печлари ёқилганида уй ҳавосининг қуришида, айниқса, кўп қўлланадиган намлантирувчи воситалардан фойдаланиш қоидаларига амал қилинмаса ва тозалаб турилмаса, фильтри ва бошқа ички деталларида моғор пайдо бўлиши ҳамда ҳавога тарқаши мумкин. Шу сабабдан мунтазам равишда намлантирувчи воситалар фильтрларини кўздан кечириб туриш ҳамда доимий фойдаланилса, ҳар куни сувини янгилаш тавсия қилинади. Шунингдек, бир неча соат давомида ундан фойдаланмасликка ҳам ҳаракат қилиш керак.

Комод (кийим кечак ёки бошқа буюмлар турадиган яшикли жавон)

Комоднинг бола устига ағдарилиб кетгани билан боғлиқ бахтсиз воқеалар бир неча марта қайд этилган. Албатта, комод ўзидан-ўзи ағдарилиб кетмайди ва катталар учун мутлақ хавфсиз ҳисобланади. Лекин болалар уни очиб зинапоядан чиққандек кўтарилишга ҳаракат қилиши турли оқибатларга олиб келади. Ҳатто Европа компанияларидан бирида болалар жароҳати кўп кузатилгани сабаб комодларнинг баъзи моделлари ишлаб чиқаришдан тўхтатилган. Мебель ишлаб чиқарувчилар шу сабабдан ҳам оддий хавфсизлик қоидаларига амал қилишни – махсус мослама билан комодни деворга қотириш ва унинг устига оғир буюмлар, масалан, телевизор қўймасликни тавсия қилади.

Хушбўй шамлар

Мутахассислар хушбўй шам ёниб турган хонада узоқ вақт бўлмаслик кераклигини таъкидлайди. Чунки бу вақтда ҳаводаги хавфли моддалар концентрацияси сезиларли даражада ортади. Гап дўконда кўп учрайдиган таркибида сунъий ароматизаторлар бўлган шамлар ҳақида кетяпти. Бундай шамлар таркибидаги заҳарли моддалар астма ва аллергик реакцияларга олиб келади.

Билиб қўйиш керак:

• Шамларни шамоллатиш мумкин бўлган хоналарда ёқинг, кўп ёқманг ва бир неча соат кетма-кет ёқилган ҳолда қолмаслигига эътибор қаратинг.
• Табиий моддалар – асал ёки соя мумидан тайёрланганини харид қилинг.

Жалюзи ҳам комодлар сингари болалар учун хавфли ҳисобланади. Масалан, АҚШда ҳар ойда икки нафар бола жалюзи шнурига бўғилишдан вафот этади. Шу сабабдан ҳам бугунги кунда ишлаб чиқарувчилар шнури калта бўлган моделларни ишлаб чиқаради. Шунга қарамай, хавфсизлик чораларига амал қилишда давом этиш: иложи борича болалар хонасига илмаслик, жалюзиси бор дераза олдига бола каравотини қўймаслик, шнурларни бола қўли етадиган баландликда қолдирмаслик ҳамда уни илгакка маҳкамлаб қўйиш керак.

Сочилиб ётган нарсалар ва сирпанчиқ пол

Ҳар йили юз минглаб одам шунчаки ерда сочилиб ётган нарсага қоқилиб йиқилишдан жароҳатланади. Йиқилишларни қуйидаги оддий қоидаларга амал қилиб олдини олиш мумкин:

• Уйни таъмирлаш вақтида сирпанчиқ бўлмаган пол қопламаларини танланг;
• Остона туртиб чиқмаса, хавфсиз бўлади; туртиб чиққан бўлса, ҳимоя гиламчалари тўшаб қўйинг.
• Буюмларни ерга ташламанг, қоқилиш мумкин бўлган ерга сумка ва пойабзалларни қўйманг;
• Уйдаги барча хоналар ёруғ бўлсин.