Бу ҳафта дайжестимиз учун позитив хабар топилмади, афсуски. Эҳтимол, борларини ҳам чуқур энергетик инқироз сабабли кўрмай қолгандирмиз.
Андижоннинг мутлақ ҳокими Шуҳратбек Абдураҳмоновнинг шовшувли аудиоси ҳақида ўтган ҳафта ҳам ёзган эдик. Қарангки, унинг давоми чиқди. Унда вилоят раҳбари Андижонда олиб борилаётган ишлар ҳақида гапирган баъзи кишиларни «сассиқ» деб атаган. «Битта-иккита сассиқ, ҳамманг ҳар ёқдан келгансан… Айт сенлар ҳам. Шармандамисан, виждонинг борми, ориятинг борми? Менга эмас Андижон. Ҳей ифлос, нима деяпсан сен Андижонни? Хоҳласанг, беш-олтитанг автобусга ўтиргин-да, бор, ўтиб кел Фарғонага, Наманганга, ташкилотларига бор. Нимадан қолиб кетаётган эканман мен Андижонда?», деди Абдураҳмонов.
Блогер ва иқтисодчи Отабек Бакиров бу воқеага муносабат билдирар экан, «синизмнинг кенглигини тушуняпсизми? Айнан бу ҳокимни қабул қила олмаганим сабаби — ҳар икки гапининг бирида ‘Мен Андижон вилоятининг уч миллион халқини боқаяпман’, дейди. Мен ўша ҳокимга кадрдан, эфирдан туриб гапирмоқчиман — Андижон вилоятининг уч миллион аҳолиси сизни боқяпти, сиз уларни эмас», деди.
Қизиғи, ўтган йили қўпол аудиолари тарқалган Шуҳрат Ғаниевнинг иши сенатда кўрилган эди. Бироқ Шуҳратбек Абдураҳмоновнинг аудиоларига расмийлардан бирор муносабат бўлгани йўқ.
* * *
Тошкент шаҳри ҳокими Жаҳонгир Ортиқхўжаев ёшлар иштирокидаги учрашувда волонтёрлар ҳақидаги гапи билан баҳс-мунозара эшигини ланг очиб берди. Учрашув давомида ёшлар Ўзбекистондаги волонтёрларни йиғиб Волонтёрлар ассоциацияси ёки федерацияси очиш таклифини билдирди. Шаҳар ҳокими бу ҳақда «товар, пул олиш, PayMe’дан пул ўтказиб бериш, кимнингдир нимасига олиб боришга ҳаддан ташқари волонтёрлар кўпайиб кетмоқда. Бир нарсани тўғри тушунинглар, сал шубҳага боряпман охирги пайтлар. Волонтёрлик касбми, ҳақиқатан, ёрдам беришми ёки бундан даромад олишми? Фарқига етолмаяпман. Тушунтира олдимми? Волонтёр тушунчаси нима дегани? Кўнгилли ишчи дегани. Лекин мен биронта волонтёрни уйда ётган қариянинг оёғига тоғорача тутиб совунлаб ювиб қўйганини кўрмадим...», деди.
Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси Комил Алламжонов бу ҳақда «ёшларга мотивация берадиган эмас, қўлига бир урадиган тадбир бўлибди», деди.
«Тегилмаган шу волонтёрлар қолганди. Бу ёшларга мотивация эмас, қўлига бир урадиган тадбир бўлибди. Ваҳоланки, пандемия даврида барча ёшлар бирлашди, Тошкент шаҳрини ҳокимият эплолмай қолганида, айнан шу волонтёрлар ҳаётини хавф остига қўйиб, одамлар дардига малҳам бўлди... Ўрганиш эмас, раҳмат дейиш керак. Ўрганиш керак бўлса, Тошкентда масала кўп», деб ёзди Алламжонов ўз саҳифасида.
Бироқ учрашувдаги ҳокимнинг айни гапининг тўлиқ версиясида «...бир ўрганиб чиқамиз. Узр сўрайман. Мен ҳам одамзодман, ҳамма нарсани тушунишга тушунавермайман», деб айтилган эди.
* * *
«Мафтунингман» киносидаги «Дўппи тикдим» қўшиғи ижрочиси, раққоса Юлдузхон роли билан барчанинг севимли киноқаҳрамонига айланган актриса Клара Жалилова 20 ноябрь куни оламдан ўтди. У анчадан бериб бетоб эди. Оила аъзоларининг айтишича, йиқилиб эти лат еганди.
Ўзбекистонда хизмат кўрсатган артист, «Дўстлик» ордени соҳибаси Клара Жалилова 1937 йилда Тошкент шаҳрида таваллуд топган. Актриса фаолиятини қўшиқчиликдан бошлаган. У «Чинор остидаги дуэл», «Келинлар қўзғолони», «Кулол ва хумча», «Сўнгги лаҳза» каби фильмларда ҳам эсда қоларли образлар яратган.
* * *
Агар муаммо кўлами унга учраган одамлар миқёси, бартараф этиш харажати миқдори билан ўлчанса, бугунги энергетик инқирозни миллий муаммо деб бемалол аташ мумкин. Бир неча йилдирки, куз охирлаши билан электр ва газ таъминотида узилишлар кўпаяди, газдан портлашлар, кўмирдан заҳарланишлар ортади. Шикоятларнинг сон-саноғи йўқ.
Бу ҳафта ҳаво ҳарорати кескин тушиб кетиши билан энергетик инқироз дарҳол юзини кўрсатди. Тўрақўрғон ИЭСда авариявий ўчиш юз берди. Оқибатда Тошкент шаҳри ва олти вилоятда электр таъминотида чекловлар киритилди. Гарчи бу носозлик икки кунда бартараф этилган бўлса-да, электр таъминотидаги узилишлар тўхтамади. Хусусан, Фарғона вилоятида электр энергияси таъминотида 28 соатгача узилишлар кузатилмоқда. Тахиатош ИЭС бир муддат ишламай қолиб, Қорақалпоғистоннинг барча шаҳар ва туманларида электр узилди.
Энергетик инқироз халқ хўжалигининг барча тармоқларига бир-бир зарба бермоқда. @trolluz ёзишича, Яккабоғда уч кун чироқ бўлмаганига 5 200 парранда нобуд бўлди. Каттақўрғонда иситилмагани учун учун иссиқхоналардаги сабзавотлар нобуд бўиб, тадбиркор тахминан 35 минг доллар зиён кўрди. Тошкент вилоятининг Келес туманидаги туғруқхонада электр узилгани айтилди. Айтиш лозимки, вилоятлардаги туғруқхоналарда электр тез-тез узилиб туради.
Кўпинча энергетик инқироздан жон сақлаб қоладиган пойтахтда ҳам бу гал ҳолат яхши эмас. Олмазор туманида ва Чилонзор туманида иссиқлик таъминотида узилиш бўлди.
Хўш, энергетика масъуллари нима демоқда? Энергетика вазирлигининг изоҳлашича, узилишларга истеъмол ортгани сабабдир. Энергетика вазири ўринбосари Шерзод Хўжаев муаммолардан хабардорлигини айтиб, «мурожаатлар сони ошгани муаммонинг кескин кўпайганлигини англатмайди. Бир неча йил аввал вазият бундан-да оғир бўлган», деди.
Сенатор Фармон Тошев Сенатнинг 9-ялпи мажлисида электр муаммосидан нолиб парламент юқори палатаси раҳбари Танзила Норбоевага мурожаат қилган эди. Норбоева газ ва электр муаммоси махсус кўриб чиқилиши, ялпи мажлисда кўтарилиши, Президентга ахборот берилишини айтди. Шу билан бирга маблағдан муаммо йўқлигини ҳам илова қилди.
Ўтган йили бош вазир Абдулла Арипов электр ва газ масаласида видеоселектор ўтказиб, «бу – шармандали ҳолат», деганди.
«Дарё» билан қолинг, охирги янгиликлардан бохабар бўлинг.
Изоҳ (0)