Андижон вилояти ҳокимлиги ижтимоий тармоқларда кетма-кет тарқалган ва жамоатчилик орасида кенг муҳокамаларга сабаб бўлаётган Шуҳрат Абдураҳмоновнинг аудиоёзувлари бўйича баёнот берди. Унда эски аудиолар махсус ишлов берилиб, қасддан тарқатилгани таъкидланган.
«Бир гуруҳ ижтимоий тармоқ фойдаланувчилари томонидан 2 йил муқаддам ёзиб олинган аудиоёзувлар ижтимоий тармоқлардан кўчириб олиниб, ғаразли мақсадда уни маълум қисмини кесиб, ‘ҳайп’ қилиш ниятида ижтимоий тармоқларга жойлаштирилиб борилмоқда.
Соҳа мутахассисларини жалб қилган ҳолда тарқалган аудиоёзувларни ўрганиш ишлари олиб борилди. Ўрганиш давомида шу маълум бўлдики, аудиоёзувлар ‘алоҳида мутахассислар’ ёрдамида турли хил аудиоёзувлардан кесиб олиб, монтаж қилинган», дейилади ҳокимлик баёнотида.
«Ижтимоий тармоқларга жойлаб борилаётган бу аудиоёзувлар йиллар давомида бир гуруҳ шахслар томонидан йиғиб борилганлиги, бу ишлар вилоят раҳбарининг имижига таъсир кўрсатиш ниятида пухта ўйланган режа асосида амалга оширилаётганлигини сезиш мумкин», дейилади расмий муносабатда ва мазкур ҳолатлар юзасидан ҳуқуқни муҳофаза қилувчи ташкилотлар томонидан дастлабки суриштирув ишлари амалга оширилаётгани билдирилган.
«Xabar.uz»нинг қайд этишича, тарқалган аудиолар «2 йил муқаддам ёзиб олингани» ҳақидаги иддаолар ҳозирданоқ шубҳа уйғотмоқда.
«Битта мисол. Сўнгги тарқалган учинчи аудиода Шуҳрат Абдураҳмонов ‘Алишер Усмонов деган ҳооов миллиардер’ қишлоқларни обод қилиш учун Наманганга ‘50 миллион доллар пул берганиъни тилга олади. Ваҳоланки, Алишер Усмонов ўзи туғилиб ўсган вилоятга шунча ҳиммат кўрсатгани ўтган йили (икки йил аввал эмас!) маълум бўлганди», — деб ёзмоқда нашр.
Мавзуга доир: Алишер Усмонов «Обод қишлоқ» дастурини амалга ошириш учун Наманганга 50 млн доллар ажратади
Эслатиб ўтамиз, тахминан 7 ноябрда интернетда Шуҳрат Абдураҳмонов унга «сассиқ гапирган» марҳаматлик уч аёлни 15 суткага қаматгани ҳақида гапирган аудио тарқалганди. Вилоят ҳокимлиги матбуот хизмати бу аудиоёзув икки йил аввалги эканини таъкидлаган, бироқ ижтимоий тармоқ фойдаланувчилари ҳокимликнинг бу баёнотини шубҳа остига олиб, хусусан, марҳаматлик аёлларнинг норозилиги 2020 йил октябрь ойи охирида юз берганини кўрсатиб ўтган эди.
Олий Мажлис Қонунчилик палатаси депутати Расул Кушербаев муҳокамаларга сабаб бўлган мазкур аудиоёзувга муносабат билдираркан, бу гаплар қачон айтилгани аҳамиятсиз эканини таъкидлаб, Андижон ҳокимини «Ленин бошлаган бошқарувнинг содиқ вориси» деб атаганди.
Мавзуга доир: Расул Кушербаев: Ҳоким ҳақорат қилса исботланмайди ёки кечирим сўралади, фуқаро танқид қилса ҳам қамалади
19 ноябрь куни Шуҳрат Абдураҳмоновнинг овози ёзилган яна бир аудиоёзув интернетда тарқалди. Унда вилоят раҳбари Андижонда олиб борилаётган ишлар ҳақида гапирган баъзи кишиларни «сассиқ» деб атаган. Ушбу хабарнинг тайёрланишига сабаб бўлган «янги аудио» аслида 2019 йилнинг июнь ойида тарқалган икки ярим соатлик эски аудиодан кесиб олинган парча экани маълум бўлди.
Изоҳ (0)