Bugun,

  • USD 10940.05
  • RUB 182.26
  • EUR 11121.65

Milliy mass-mediani qo‘llab-quvvatlash va rivojlantirish jamoat fondi vasiylik kengashi raisi Komil Allamjonov Toshkent shahar hokimi Jahongir Ortiqxo‘jayevning yoshlar bilan uchrashuvda volontyorlar haqida aytgan fikriga e’tiroz bildirdi.

Innovatsion rivojlanish vazirligida bo‘lib o‘tgan tadbirda chiqish qilgan poytaxt hokimi volontyorlar haqida gapirgan. U ayrim volontyorlar faoliyatiga shubha bilan qarashini bildirib, ularning asl niyati boshqalarga yordam berishmi yoki daromad olishmi, qabilida savol qo‘ygan va ularning faoliyatini tekshirish kerakligini ta’kidlagan.

“Tovar, pul olish, Payme’dan pul o‘tkazib berish, kimgadir nimadir olib borib berishda volontyorlar juda ko‘payib ketdi. Bitta narsani to‘g‘ri tushuninglar, men sal shubhaga boryapman — bu volontyorlik kasbmi yoki haqiqatan yordam berishmi? Yoki bundan daromad olishmi, farqiga borolmayapman. Volontyor ko‘ngilli ishchi degani bo‘lsa, lekin men birorta volontyorni shu paytgacha biror qariyaning oyog‘ini yuvgani yoki sochini tarab qo‘yganini ko‘rmadim”, — degan Jahongir Ortiqxo‘jayev.

Milliy mass-mediani qo‘llab-quvvatlash va rivojlantirish jamoat fondi vasiylik kengashi raisi Komil Allamjonov hokim Ortiqxo‘jayevning bu gaplariga e’tiroz bildirgan. Uning yozishicha, Innovatsion rivojlanish vazirligi binosida o‘tkazilgan uchrashuv “yoshlarga motivatsiya emas, qo‘liga bir uradigan tadbir” bo‘lgan.

Komil Allamjonov.

Komil Allamjonov.
Foto: “Daryo”
Tegilmagan shu volontyorlar qolgandi. Bu yoshlarga motivatsiya emas, qo‘liga bir uradigan tadbir bo‘libdi. Vaholanki, pandemiya davrida barcha yoshlar birlashdi, Toshkent shahrini hokimiyat eplolmay qolganida, aynan shu volontyorlar hayotini xavf ostiga qo‘yib, odamlar dardiga malham bo‘ldi.

O‘sha paytda yordamga muhtoj bo‘lib, uyda yotgan ayrim qariyalarga oyog‘ini tog‘oraga suv solib, sovun bilan yuvish emas, balki sumkada tashilgan yeguliklar kerak edi. Endi ularni o‘rganish kerakmish. Ular daromad olyaptimi yoki ko‘ngilli yordamchilarmi, shuni o‘rganish kerakmish.

O‘rganish emas, rahmat deyish kerak. O‘rganish kerak bo‘lsa, Toshkentda masala ko‘p.

Komil Allamjonov, Milliy mass-mediani qo‘llab-quvvatlash va rivojlantirish jamoat fondi vasiylik kengashi raisi 

Allamjonov postiga, shuningdek, “Pichoqni oldin o‘zingga ur, og‘rimasa birovga!”, deb postskriptum qo‘ygan, shuningdek, #Bo‘ldidaEndi, #ShaharBedarvozaEmas, #LyubayaBiznesXorosha, #MikrofonBerilmasinShuOdamga kabi heshteglarni ilova qilgan.
Ma’lumot uchun, Komil Allamjonov 2020-yilning yanvar oyidan buyon Milliy ommaviy axborot vositalarini qo‘llab-quvvatlash va rivojlantirish jamoat fondi vasiylik kengashiga rahbarlik qilmoqda. Bunga qadar Allamjonov Prezident administratsiyasi huzuridagi Axborot va ommaviy kommunikatsiyalar agentligi direktori lavozimida ishlagan. Avvalroq esa Prezidentning matbuot kotibi va bir vaqtning o‘zida davlat rahbarining ijro apparati rahbari o‘rinbosari bo‘lgan.

Izoh
Asosiy yangiliklar
Mahalliy
Samarqandda noqonuniy mayning ferma aniqlandi
Salomatlik
Yutinganda tomoq og‘rib, quloqqa tarqalsa, qanday yo‘l tutish kerak?
Sport
Murodjon Ahmadaliyev IBF kamari uchun himoya jangini o‘tkazadi