Сурхондарё ҳудудий электр тармоқлари корхонаси вилоятдаги электр таъминотида кузатилган узилишлар юзасидан изоҳ берди. Бу ҳақда вилоят ҳокимлигининг ахборот хизмати хабар берди.
Сурхондарё ҳудудий электр тармоқлари корхонаси матбуот котиби Азимбек Самадов вилоят ҳудудида содир бўлган электр таъминотидаги узилишлар бўйича қуйидагиларни маълум қилган.
«Узилишлар ва энергия тизимидаги қувват танқислигига Талимаржон ва Тўрақўрғон иссиқлик электр станциялари ҳамда Туркманистон билан боғловчи 500 киловолтли тармоқда содир бўлган носозликлар натижасида Магистрал электр таъминоти корхонаси станцияларида юкламани камайтиришнинг махсус автоматикаси ишлаб кетган. Оқибатда вилоятдаги электр энергиясининг қуввати 500 мегаваттдан 370-400 мегаваттга тушиши оқибатида шаҳар ва туманларда узилишлар юзага келган. Ҳолатларни мутахассислар томонидан бартараф этиш чоралари кўрилмоқда, юзага келаётган ноқулайликлар учун узр сўраймиз», – деган Азимбек Самадов.
20 ноябрда Энергетика вазирлиги матбуот хизмати истеъмолчилар эҳтиёжини таъминлаш учун Тахиатош ИЭСнинг қуввати 280 мегаватт бўлган 1-энергоблоги ҳамда Талимаржон ИЭСнинг қуввати 450 мегаватт бўлган 2-энергоблоги ҳам тўлиқ қувватда ишлаши таъминланганини маълум қилган.
Аввал Фарғона вилоятида электр энергияси таъминотида 28 соатгача узилишлар кузатилаётгани, Тахиатош ИЭС совуқ кунларда қарийб бир ярим кун ишламай қолгани, Келесдаги туғруқхона электр таъминотида узилиш кузатилди. Ҳолат юзасидан изоҳ берилгани ҳақида хабар қилинган.
Энергетика вазирлиги Ўзбекистонда электр энергияси таъминотидаги узилишларнинг асосий сабаби ҳавонинг совиб кетиши натижасида электр энергияси истеъмолининг кескин ортиши эканлигини маълум қилган. Кейинчалик, Монополияга қарши курашиш қўмитаси сўнгги пайтларда газ ва электр муаммолари юз бераётгани бўйича қўмита ва унинг ҳузуридаги агентликка мурожаат қилишни сўраган.
Изоҳ (0)