Тошкентда Киночилар уйи қайта тикланади

Шавкат Мирзиёевнинг киноарбоблар билан Ўзбекфильм киностудияси биносида ўтказган учрашуви давомида Tashkent City қурилишидан аввал бузиб ташланган Киночилар уйи биноси қайта тикланиши, киночилар учун янги уйлар қурилиши, киноакадемия ташкил қилиниши ва унинг биноси қурилиши режалаштирилгани маълум қилинди. Бу ҳақда «Ўзбекистон 24» телеканалида эфирга берилган репортажда қайд этилган.

Репортажда режиссёр Ҳамидулла Ҳасанов Ўзбекфильм студияси таниб бўлмас даражада ўзгариб кетгани, замонавий техникалар, декорациялар олиб келинганидан хурсандлигини билдирган.

Бошқа бир режиссёр Баҳодир Одилов ҳам учрашувдан олган таассуротлари ҳақида гапириб, киночиларнинг кайфияти кўтаринки эканлигини таъкидлаган.

«Студия ёнидаги майдонда Киночилар уйининг қурилиши бошланади. Ундан ташқари, «Ўзбекфильм» ҳудудида киночилар учун янги уйлар ҳамда учинчи катта совға – режиссёрлар, сценарийнавислар, операторларни тайёрловчи махсус киноакадемия ташкил қилинади. 20 ноябрни Ўзбек киносининг қайта туғилган куни деб атаса бўлади, деб ўйлайман. Уч йил ичида кино жуда ҳам ўзгариб кетди, янг-янги фильмлар ишланди», – дея учрашувдаги таассуротлари ҳақида гапирган Баҳодир Одилов.

Киночилар уйининг янги биноси «Ўзбекфильм» студияси ёнида, Чилонзор кўчасида янгидан барпо этилади.

1982 йилда Тошкентдаги Осиё, Африка ва Лотин Америкаси мамлакатлари кинофестивали муносабати билан фойдаланишга топширилган Киночилар уйи биносини бузиш ишлари 2017 йил охирида бошланган, ўшанда бино меъмори Рафаэл Хайрутдиновнинг рафиқаси Фируза Хайрутдинова бузиб ташланаётган бино билан хайрлашишга келганди. 2018 йил январь ойида Киночилар уйи тўлиқ бузиб ташланган.

Айни вақтда собиқ бино ўрнида Tashkent City мажмуасининг Hilton меҳмонхонаси бунёд этилган ва 2019 йил октябрь ойида фойдаланишга топширилган. 21 қаватли бинода 258 та номер мавжуд — 8 таси давлат раҳбарлари учун мўлжалланган. Отелда бир нечта ресторан, бассейн, спорт зал, спа ва бошқа салонлар бор.

Киночилар уйининг қайта тикланиши ҳақида илк бор 2019 йил декабрь ойида хабарлар тарқалган, «Ўзбекфильм» студияси ёнидаги «Замин» ресторани ўрнида қурилиши тахмин қилинганди. Шунингдек, 2019 йил 26 декабрда Тошкентда ўтказилган «Миллий кинематография: ривожланиш истиқболлари ва устувор вазифалар» Республика кино форумида Киночилар уйини қайта тиклаш, Тошкент халқаро кинофестивалини ўтказиш, Кинематография институтини ташкил қилиш, «Ўзбекфильм» туристик марказини очиш, миллий сериаллар студиясини яратиш сингари бир қатор масалалар муҳокама этилган.