Шавкат Мирзиёев 19 ноябрь куни Тошкент шаҳрида амалга ошириладиган бунёдкорлик ишлари тақдимоти билан танишди. Президент матбуот хизматининг хабар беришича, тақдим этилган лойиҳалардан бири «Наврўз» қабуллар уйидан самарали фойдаланишга оид.
«Ушбу мажмуани капитал таъмирлаб, Давлат иштирокидаги корхоналарни соғломлаштириш ҳамда давлат активларини хусусийлаштириш маркази ташкил этиш режалаштирилган. Бу ерда тадбиркорларга маълумотлар очиқ ва шаффоф тарзда тақдим этилади», — дейилади расмий ахборотда.
Президент, шунингдек, Олмазор туманининг 150 минг киши яшаши кутилаётган йўлдош-шаҳарчаси, Тошкентдаги Темурбеклар мактаби, Тошкент архитектура-қурилиш институтининг янги биноси ёнида ташкил этиладиган қурилиш коллежи, қурилиш материаллари бўйича илмий-тадқиқот маркази ва бошқа объектлар бўйича лойиҳалар билан ҳам танишган ва зарур кўрсатмалар берган.
Эслатиб ўтамиз, Қашқадарё вилояти Қарши шаҳрида Корхоналарни соғломлаштириш ва хусусийлаштириш клиникаси очилганди ва Президент Шавкат Мирзиёев 12 ноябрь куни мазкур марказга ташриф буюрганди.
Изоҳ (0)