Тошкент шаҳрининг Бўзсув аэрация станцияга Қорақамиш ва Жануби-ғарбий коллекторлардан суткасига 630 минг куб метр оқова сув келиб тушмоқда. Шаҳарда 2020 йилнинг ўтган даври мобайнида оқова сувдан махсус мосламалар орқали ушлаб қолинган маиший ва саноат чиқиндиларининг ҳажми 292 тоннага етган. Бу ҳақда «Ўзсувтаъминот» АЖ ахборот хизмати томонидан маълум қилинди.
Компания томонидан хабар берилишича, аҳоли томонидан канализацияга ташлаб юборилаётган чиқиндилар орасида озиқ-овқат қолдиқлари, елим идишлар, кийим-кечаклар, болалар тагликлари ва ҳоказолар бор. Шунингдек, ишлаб чиқариш корхоналари томонидан канализацияга тўқимачилик қолдиқлари, қушхона чиқиндилари ташланмоқда.
Бу кўрсаткич 2017 йилда 110 тоннани, 2018 йилда 182 тоннани, 2019 йилда 164 тоннани ташкил қилган. Қайд этилишича, канализацияга ташланаётган маиший ва саноат чиқиндиларининг ҳажми йилдан йилга ошиб бормоқда.
Компания томонидан таъкидланишича, канализация тизимидаги бузилишларнинг аксарияти эса юқоридаги келтирилган ҳолат каби унитаз ёки канализация қудуғига маиший ва саноат чиқиндилари ташланиши оқибатида содир бўлади.
«Бугунги кунда «Ўзсувтаъминот» АЖ томонидан айни йўналишда тарғибот ишлари бошлаб юборилган. Хусусан, канализациядан тўғри фойдаланиш бўйича қўлланмалар тайёрланиб, истеъмолчиларга тарқатилмоқда», — дейилади компания хабарида.
Изоҳ (0)