Тошкент шаҳрида 18 ноябрь куни ёғган кучли қор сабабли пойтахт йўлларида юзага келган мураккаб вазиятни бартараф этиш учун шаҳарнинг бир қатор хизматлари сафарбар қилинди. Бу ҳақда «Kun.uz» хабар берди.
Қайд этилишича, Тошкент кўчаларида автомобилда ҳаракатланиш ҳақиқий синовга айланиб, кўчалар тирбандликларга тўлган, йўл-транспорт ҳодисалари каррасига ошган, йўллар яхмалакка айланган пайтда пойтахт коммунал хизматлари ҳам ўзига хос имтиҳондан ўтди.
Нашрнинг ёзишича, барча кучлар мавжуд вазият оқибатларини бартараф этишга сафарбар қилинди. Йўлларга қум сепилди, энг катта тирбандликлар, авариялар кузатилган ҳудудларга ёрдам кучлари етказилди. Ҳамма ухлаганда, аксарият автомобиллар манзилига етиб борганда ҳам иш тўхтамади.
Пойтахтда фаолият юритувчи қуйидаги ташкилотлар ўзларининг энг ходимлари билан бу жараёнда иштирок этди:
- Ободонлаштириш бош бошқармаси;
- «Махсустранс» ДУК;
- «Тошиссиққуввати» ДУК;
- Тошкент шаҳар сув таъминоти корхонаси;
- Тошкент иссиқлик маркази;
- «Тошшаҳарнур» ДУК;
- «Пойтахтгаз»;
- Электр тармоқлари корхонаси;
- Туман ҳокимликлари коммунал хизмат кўрсатиш ходимлари;
- Транспорт бошқармаси;
- Тошкент шаҳар канал ва уларга туташ ҳудудларни ободонлаштириш бошқармаси;
- Шаҳар сунъий иншоотлардан фойдаланиш бошқармаси;
- Марказий майдонларни ободонлаштиришга ихтисослашган бошқарма.
Фавқулодда вазиятлар вазирлиги Ўзбекистонда 18 ноябрь куни бошланган ноқулай об-ҳаво шароити 20 ноябрга қадар давом этиши кутилаётганини маълум қилганди. «Ўзгидромет» синоптиклари эса Ўзбекистонда изғирин совуқ келаси ҳафта бошигача сақланиб қолишини билдирди.
Изоҳ (0)