Shavkat Mirziyoyev 19-noyabr kuni Toshkent shahrida amalga oshiriladigan bunyodkorlik ishlari taqdimoti bilan tanishdi. Prezident matbuot xizmatining xabar berishicha, taqdim etilgan loyihalardan biri “Navro‘z” qabullar uyidan samarali foydalanishga oid.
“Ushbu majmuani kapital ta’mirlab, Davlat ishtirokidagi korxonalarni sog‘lomlashtirish hamda davlat aktivlarini xususiylashtirish markazi tashkil etish rejalashtirilgan. Bu yerda tadbirkorlarga ma’lumotlar ochiq va shaffof tarzda taqdim etiladi”, — deyiladi rasmiy axborotda.
Prezident, shuningdek, Olmazor tumanining 150 ming kishi yashashi kutilayotgan yo‘ldosh-shaharchasi, Toshkentdagi Temurbeklar maktabi, Toshkent arxitektura-qurilish institutining yangi binosi yonida tashkil etiladigan qurilish kolleji, qurilish materiallari bo‘yicha ilmiy-tadqiqot markazi va boshqa obyektlar bo‘yicha loyihalar bilan ham tanishgan va zarur ko‘rsatmalar bergan.
Eslatib o‘tamiz, Qashqadaryo viloyati Qarshi shahrida Korxonalarni sog‘lomlashtirish va xususiylashtirish klinikasi ochilgandi va Prezident Shavkat Mirziyoyev 12-noyabr kuni mazkur markazga tashrif buyurgandi.
Izoh (0)