Дональд Трамп ўз маъмурияти билан Эрондаги уранни бойитиш заводига эҳтимолий ҳужумни муҳокама қилган. Бу ҳақда The New York Times собиқ ва амалдаги америкалик мансабдорлар орасидаги тўртта манбасига таяниб хабар берди, деб ёзади Meduza.
Ҳужум ғояси муҳокама қилинган мажлис Оқ уйда 12 ноябрь куни — МАГАТЭ назоратчилари Эрон ядро дастурининг асосий объекти Натанзда уран захиралари фаол равишда етиштирилаётгани ва улар аллақачон ядро келишувида кўзда тутилган ҳажмдан 12 баробар ошиб кетганини маълум қилганидан кейин ўтказилган.
Манбаларга кўра, АҚШнинг амалдаги раҳбари Натанздаги заводга авиаҳужум ёки киберҳужум уюштириш вариантларини кўриб чиқишни таклиф қилган, аммо вице-президент Майкл Пенс, давлат котиби Майкл Помпео, мудофаа вазири вазифасини бажарувчи Кристофер Миллер ва Қуролли кучлар штаб бошлиқлари қўмитаси раиси Марк Милли Трампни бу қадамни босишдан қайтарган. Президент маслаҳатчилари бундай хатти-ҳаракатлар Яқин Шарқда катта кўламли ҳарбий низога олиб келиши мумкинлигини айтган.
Газетада қайд этилишича, ўзининг АҚШ президенти лавозимидаги сўнгги кунларида Дональд Трамп Эрон билан алоқаларни ёмонлаштиришда ва давлатларга қарши санкциялар киритишда давом этмоқда, буни у ўз давомчиси Жо Байденга Теҳрон билан ядро битимини қайта тиклаш қийинроқ бўлиши учун қилмоқда (ундан Вашингтон 2018 йилда чиққан).
Эслатиб ўтамиз, АҚШда президент сайлови 2020 йил 3 ноябрда бўлиб ўтди. 15 ноябрь ҳолатига кўра, натижалар ҳали расман эълон қилинмади. Америка ОАВлари Демократлар партиясидан номзод Жо Байденни ғолиб деб топди, Трамп сайловдаги мағлубиятини ҳали ҳам расман тан олмаган. Байден унинг мағлубиятини тан олишдан бош тортишини шармандалик деб атади.
АҚШдаги президентлик сайловида берилган овозларни ҳисоблаш ҳали якунланмаган ва ғолиб расман эълон қилинмаган.
Изоҳ (0)