Индонезия исломий сиёсий партиялари мамлакатда алкоголь сотиш ва истеъмол қилишни тақиқлаш ҳақидаги қонун лойиҳасини кўриб чиқиш учун илгари сурди, деб ёзади «РБК».
Киритилган таклифга кўра, қонун таркибида 1 фоиздан 55 фоизгача спирт бўлган барча алкогол ичимликларини тақиқлашни кўзда тутади. Алкоголни ишлаб чиқариш, сақлаш ёки сотишга қўйилган тақиқни бузганлик учун сиёсатчилар 100 минг долларгача жарима ёки икки йилдан ўн йилгача муддатга қамоқ жазосини белгилашни таклиф қилди. Спиртли ичимликни истеъмол қилганлик учун эса икки йилгача ҳибс ёки 5 минг доллар жарима таклиф этилди.
Шу билан бирга, баъзи истисноларни киритиш таклиф қилинмоқда, масалан, дори воситалари ва диний маросимлар учун. Шунингдек, сайёҳларга спиртли ичимлик сотиш учун махсус рухсатномалар жорий қилиниши мумкин, аммо бу тизим қандай ишлашига қонун лойиҳаси муаллифлари аниқлик киритгани йўқ.
Бали меҳмонхоналар ассоциацияси раиси Рики Путра бундай чора-тадбирлар мамлакатда сайёҳлик бизнесига жиддий зарар етказиши юзасидан хавотирини билдирди.
«Чегаралар яна очилганида қандай қилиб одамларни бу ерга келишга жалб қиламиз? Нафақат халқаро меҳмонлар, балки индонезияликлар ҳам ҳатто бир шиша пиво ичиш мумкин бўлмаган жойда дам олиб нима қиламиз, деб Балига келмайди», — дея аниқлик киритди у.
Путранинг сўзларига кўра, Индонезия иқтисодиёти коронавирус пандемияси туфайли жиддий зарар кўриб бўлган, навбатдаги тақиқ эса вазиятни фақат ёмонлаштиради. The Sydney Morning Herald маълумотларига кўра, фақат Балига етган зарар аллақачон 95 фоизни ташкил қилган.
Бундай қонун қабул қилинган тақдирда, Бали алкоголь сотиш ва истеъмол қилиш тақиқланган ягона туристик орол бўлмайди. Айни пайтда бундай қонун Мальдив оролларида маҳаллий аҳоли учун амал қилади. Сайёҳлар спиртли ичимликларни фақатгина меҳмонхоналар ҳудудларида истеъмол қилиши мумкин. Шунингдек, алкоголь истеъмоли бўйича жиддий чекловлар БААда ҳам амал қилади. У ерда жамоат жойларида спиртли ичимлик ичганлик учун ҳибсга олиш жазоси қўлланилиши мумкин.
Изоҳ (0)