АҚШда энг кам иш ҳақи соатига 15 долларгача кўтарилади. Бу ҳақда Америка ОАВлари томонидан президент сайловлари ғолиби деб аталаётган АҚШ Демократик партияси номзоди Жо Байден Twitter’да маълум қилди, деб ёзади «РБК».
Унинг сўзларига кўра, мамлакат коронавирус пандемияси оқибатида юзага келган инқироздан кейин қайта тиклана бошлаганида соатбай иш ҳақи оширилади. «Биз буни баландроқ иш ҳақи, шу жумладан, 15 долларлик энг кам иш ҳақи, яхшироқ имтиёзлар ва кучлироқ коллектив шартномалар билан амалга оширамиз, булар сизларга оилангизни таъминлашга ёрдам беради», — деб ёзди Байден.
Унинг таъкидлашича, буларнинг барчаси Америка ўрта синфини қайтариш ва уни ҳар қачонгидан яхшироқ қилиш имконини беради.
АҚШ меҳнат вазирлиги томонидан ўрнатилган энг кам иш ҳақи ҳозир соатига 7,25 долларга тенг. Аммо кўплаб штатларда энг кам иш ҳақида бундан анча баланд. Вашингтон штатида пастки чегара соатига 13,5 доллар, Массачусетсда — 12,75 доллар этиб белгиланган. Американинг яна бир қатор штатлари — Мен, Коннектикут, Колорадо, Аризона, Калифорния, Орегонда энг кам иш ҳақи соатига 12 доллар.
Айни пайтда баъзи штатларда — Жоржия ва Вайомингда бу рақам федерал минимумдан пастроқ, Америка Самоасида эса иш ҳақининг махсус минимал ставкалари амал қилади.
Иш ҳақининг энг кам миқдорини ошириш Байденнинг сайловолди кампаниясининг асосий бандларидан бири эди. Амалдаги президент Дональд Трамп билан 22 октябрда ўтказилган мунозараларда демократ соатбай иш ҳақининг минимал ставкасини 15 долларгача кўтариш COVID-19 пандемияси туфайли муаммоларга учраган кичик бизнесни қўллаб-қувватлаш усулларидан бири деб айтган эди.
Трамп бунга жавобан энг кам иш ҳақининг оширилиши кўплаб корхоналарни ёпилишга ёки ходимларининг катта қисмини ишдан ҳайдашга мажбур қилишини айтганди. Шу билан бирга, у иккинчи муддатга сайланса, энг кам иш ҳақини ошириш имкониятини кўриб чиқишга ваъда берган эди.
Изоҳ (0)