17 ноябрь куни АҚШ собиқ президенти Барак Обаманинг «Орзудаги замин» (A Promised Land) номли китоби сотувга чиқди. Обама ўз китобида президентлик йилларига оид хотираларини ёзган. Ундаги парчаларнинг бирида «Россия эндиликда кучли держава эмаслиги» ва мамлакат қандай сабабларга кўра ушбу мақомдан айрилгани маълум қилинган, деб хабар беради «РБК».
«Бизникидан кейинги (Америкадан) ўринда турадиган ядровий арсеналга эга Россияга Қўшма Штатлардаги каби ўзининг бутун дунёдаги ҳарбий кучини намоён этадиган кенг альянс ва базалар тармоғи етишмади. Россия иқтисодиёти Италия, Канада ва Бразилия иқтисодиётлардан ортда қола бошлади, шунингдек, фақатгина нефть, газ, минераллар ва қуролланиш савдосига боғланиб қолди», — дея баҳо беради Обама.
Бундан ташқари, Обама ўз китобида Россиядаги коррупция даражасининг юқорилигига, ижтимоий тенгсизлик ва аҳолининг эркаклар қисмининг умрини давомийлиги пастлигига эътибор қаратган.
A Promised Land китобининг биринчи томи Penguin Random House нашриёти томонидан чоп этилган. Биринчи қисми 768 саҳифадан иборат ва 25 тилга таржима қилинган. 2017 йилда, Обаманинг истеъфосидан бир неча ой ўтиб, Penguin Random House нашриёти собиқ президентнинг мемуарларини чоп этиш ҳуқуқи учун 60 миллион доллар тўлаган.
АҚШ собиқ президентининг бунга қадар ҳам бир нечта китоби чоп этилган — «Отамнинг орзуси» (1995 йил), «Умиднинг мардлиги» (2006 йил) ва «Сен ҳақингда куйлайман: қизларимга мактуб» (2010 йил).
Эслатиб ўтамиз, 2018 йилда Мишел Обаманинг «Шаклланиш» (Becoming) деб номли мемуарлари 24 тилда чоп этилганди. У китобда ўзининг аждодлари ва қандай қилиб Саут-Сайддан чиққан кичкина қиз ўз овозига эга бўлиб, бошқаларни руҳлантириш учун ўзида куч топганлиги ҳақида ҳикоя қилади.
Изоҳ (0)