Буюк Британия бош вазири Борис Жонсон коронавирусга чалинган фуқаро билан мулоқотда бўлгани сабаб ўзини яккалаш режимига ўтди. Бу ҳақда бош вазир қароргоҳи вакилига таяниб, The Telegraph хабар берди.
Жонсон масофадан туриб ишлашни, жумладан, коронавирус пандемиясига қарши курашни давом эттиради.
Бош вазирнинг ўзи Twitter’даги саҳифасига ўзида COVID-19 белгилари кузатилмаётгани, бироқ тартиб-қоидага бўйсуниб, ўзини яккалашини ёзиб қолдирган.
The Telegraph’нинг ёзишича, 12 ноябрь куни бош вазир бир гуруҳ парламент аъзолари билан гаплашган бўлиб, кейинроқ уларнинг бирида коронавирус тасдиқланган.
Эслатиб ўтамиз, Борис Жонсоннинг апрель ойида коронавирус билан касалланиб, касалхонага ётқизилганди. Икки ҳафтадан сўнг у яна ўз ишига қайтган.
Аввалроқ тан соқчисида COVID-19 аниқлангани туфайли Германия президенти карантинга олингани тўғрисида хабар берилганди.
Изоҳ (0)