Арманистон бош вазири Пашинянни ўлдиришга тайёрланишда гумонланиб қўлга олинган МХХ собиқ раҳбари суд залидан озод қилинди

Ереванда суд Арманистон Миллий хавфсизлик хизмати собиқ директори Артур Ванецянни ҳибсга олишдан бош тортди, у аввалроқ бош вазир Никол Пашинянни ўлдиришга тайёргарлик кўриш иши бўйича қўлга олинган эди. Бу ҳақда Meduza хабар бермоқда.

Sputnik аниқлик киритишича, суд Ванецянни ҳибсга олиш ҳақидаги қарорни ғайриқонуний деб топди.

Суд қароридан кейин Ванецян ўзининг таъқиб қилинишини сиёсий мақсадга эга деб ҳисоблашини айтди.

«Амалдаги ҳукумат яна бир марта ноқонуний ва қалбаки ишлар билан менинг сиёсий фаолиятимга тўсқинлик қилишга уринди. Лекин худога шукур, адолат бор ва у бу босқичда ғалаба қозонди», — деди Ванецян суд биносини тарк этаркан. У судга яна қайтиб келишини айтди.

Ванецян, шунингдек, ноқонуний қурол айланишига алоқадорликда ва ҳукуматни тортиб олишга тайёрланишда ҳам гумон қилинганди. «Ҳукуматнинг мамлакат ичида сиёсий мухолифатчиларни бостириш мақсадидаги ‘ижодкорликъкагина қодир бўлган фикр-хаёл парвози шу даражага етдики, энди улар ҳукуматни ўзлаштириш ва Никол Пашинянни ўлдиришга тайёргарлик кўриш айбловини ўйлаб топди», — деб ёзганди унинг адвокати Лусине Саакян.

Артур Ванецян ва бошқа мухолифатчилар Арманистондаги норозилик акцияларидан кейин қўлга олинди. Озарбайжон ва Россия билан тинчлик шартномаси шартларидан норози бўлганлар Пашиняннинг истеъфосини талаб қилмоқда.

Аввалроқ Арманистон Махсус тергов хизмати Ереванда оммавий йиғилишларни ноқонуний ташкил этиш бўйича жиноий иш доирасида мухолифатнинг 10 нафар раҳбари қўлга олинганини маълум қилган эди.

Эслатиб ўтамиз, Ереванда 10 ноябрдан буён оммавий норозиликлар давом этмоқда. Бунга Арманистон бош вазири Никол Пашинян Тоғли Қорабоғдаги урушни тугатиш тўғрисидаги битимни имзолагани сабаб бўлган. Битимга кўра Тоғли Қорабоғ ҳудудининг қарийб ярми Озарбайжон назоратига ўтади. Намойишчилар келишувни «сотқинлик» деб атаган ва уни имзолаган Пашинян истеъфосини талаб қилмоқда.

Пашиняннинг ўзи ушбу битимни имзолашдан бошқа чораси қолмаганини айтган. Унинг фикрича, Арманистон жанговар ҳаракатларни давом эттирганида, нафақат Тоғли Қорабоғ пойтахти Степанакертни, балки бутун Тоғли Қорабоғни қўлдан чиқарган, минглаб ҳарбий хизматчилар қуршовда қолиб кетган бўларди.

«Ватан» мухолифат партияси етакчиси Артур Ванесян Арманистон Тоғли Қорабоғда ўт очишни тўхтатиш тўғрисидаги битим шартларини мамлакатда ҳукумат алмашганидан сўнг ўзгартириши мумкинлигини маълум қилган.