Перунинг вақтинчалик президенти Мануэль Мерино де Лама истеъфо берди. Бу ҳақда у халққа мурожаат қилиб сўзлаган нутқида маълум қилди, деб ёзади «РБК». Шундан кейин кўп ўтмай, мамлакат парламенти раиси Луис Вальдес парламент президиуми раисларининг истеъфоси ҳақида эълон қилди.
Мерино де Лама мамлакат президенти вазифасини вақтинчалик бажарувчи лавозимига олти кун аввал — 10 ноябрь куни киришган эди. У пора олишда айбланаётган Мартин Вискарра ўрнини эгаллаганди.
Мерино де Ламани лавозимидан четлатиш талаби Перуда 9 ноябрь куни бошланган норозилик намойишларида икки киши ҳалок бўлиши билан боғлиқ. 14 ноябрь куни Лимада миллий полиция билан тўқнашувлар чоғида икки ёш йигит вафот этган.
Шундан кейин Перу вазирлар маҳкамасининг 13 аъзоси Мерино де Лама билан ишлашдан бош тортди ва ишдан кетишини маълум қилди. Улар орасида соғлиқни сақлаш, қишлоқ хўжалиги, адлия, иқтисодиёт, маданият, савдо ва туризм, таълим, энергетика, мудофаа ҳамда ички ишлар вазирлари бор.
Меринонинг истеъфосидан бир дақиқа аввалроқ парламент раиси Луис Вальдес парламент партияларининг барчаси президент истеъфоси зарурлигига рози бўлганлигини эълон қилди. Республика конгресси акс ҳолда Мануэль Меринога қарши импичмент жараёнини бошлаш билан таҳдид қилди. Мамлакатнинг янги раҳбарияти ҳақида қарор қабул қилиш учун парламент шошилинч видеоконференция ўтказишни режалаштирмоқда.
Перудаги сиёсий инқироз сентябрда бошланди. Ўшанда давлат раҳбари Вискаррага тегишли аудиоёзув эълон қилинганди. Унда президент қўшиқчи Ричард Свинг билан учрашганини тан олган. Вискарра Маданият вазирлиги билан шартнома туфайли қўшиқчига нисбатан суд иши юзасидан текширувларга тўсқинлик қилишда айбланганди. Вискарра мамлакат ҳудудларидан бирини бошқараётган вақтида йирик миқдорда пора олганликда гумон қилинди.
Дастлаб конгресс (Перунинг бир палатали парламенти) Вискаррага нисбатан импичментни ёқлаб овоз берган эди, аммо беш кундан кейин ўз қарорини ўзгартирди. Ўшанда депутат Франциско Сагасти буни мамлакат коронавирус пандемияси шароитларида яшаётган бир пайтда ҳозир импичментнинг вақти эмаслиги билан изоҳлаган эди. Охир-оқибат, Вискарра 10 ноябрь куни лавозимидан олинди. Шундан кейин Перуда унинг тарафдорлари кўчаларга чиқди.
Эслатиб ўтамиз, Вискарранинг истеъфосини 105 нафар парламент аъзоси қўллаб-қувватлаган, 19 нафари қарши чиққан, тўрт киши бетараф қолган эди. Конституцияга мувофиқ, давлат раҳбари ўрнини парламент спикери Мерино де Лама эгаллаб турган, 10 ноябрь куни у қасамёд қабул қилганди. El Peruano газетасининг ёзишича, Вискаррани лавозимидан четлатиш қарори унинг «маънавий ночорлиги» туфайли қабул қилинган.
Изоҳ (0)