SpaceX ва Tesla бош директори Илон Маск коронавирус инфекциясига бир кунда топширган тестларнинг иккитаси ижобий ва яна иккитаси салбий чиққанини маълум қилди. Бу ҳақда у ўзининг Twitter’даги саҳифасига ёзган.
«Бугун COVID-19’га тўрт маротаба тест топширдим. Иккитаси салбий натижа чиқарди, иккитаси — ижобий», — дейди миллиардер.
Унинг таъкидлашича, тестларнинг барчаси BD (Becton, Dickinson and Company) компанияси томонидан ишлаб чиқарилган, антигенни аниқлайдиган экспресс-тестлар бўлган, ҳаммасини битта ҳамшира олган. Бу ҳолатни Маск «жуда шубҳали» деб атаган.
Эълон қилган постининг остига Маск бошқа лабораторияда ПЗР-тест топширишга қарор қилганини ёзган. Уларнинг натижаси 24 соат ичида маълум бўлади. Шунингдек, Маскнинг қўшимча қилишича, айни вақтда унда оддий шамоллаш аломатлари кузатилмоқда.
АҚШ озиқ-овқат маҳсулотлари ва дори воситаларини назорат қилиш бошқармаси (FDA)нинг BD компанияси экспресс-тестлари (Илон Маск айнан шундай тестдан фойдаланган) ҳақидаги маълумотига кўра, антиген тестларнинг сезгирлик даражаси коронавирусни аниқлашга мўлжалланган молекуляр тестларникига нисбатан пастроқ.
«Бу тест салбий натижа бериши, яъни, COVID-19 ни юқтириб олган айрим одамларга нотўғри (сохта салбий) натижа чиқариб бериши мумкин», — дейилади FDA ахборотида. Бошқарма ахборотида таъкидланишича, агар антигенга топширилган тест салбий натижа берса, уни ПЗР услубига асосланган тест орқали тасдиқлатиш лозим.
Жаҳонда коронавирус эпидемияси бошланган вақтда Илон Маск COVID-19 атрофида юзага келган ваҳимани аҳмоқлик деб атаган (шу баёнотидан бир ҳафта ўтиб у 5,5 миллиард доллар йўқотган эди), шунингдек, касаллик тарқалиши муносабати билан Калифорнияда карантин жорий этилишига қарши чиққан эди.
Изоҳ (0)