Хитой Жо Байден ва Камала Харрисни АҚШ президентлиги ҳамда вице-президентлиги сайловларида эришган ғалабаси билан табриклади. Бу ҳақда Хитой ТИВнинг расмий вакили Ван Венбинга таяниб, «РБК» хабар берди. У табрик мактуби айнан ким томонидан имзоланганига аниқлик киритмаган.
«Биз АҚШдаги президентлик сайловларини Қўшма Штатларнинг ичидан туриб ҳам, халқаро ҳамжамият томонидан ҳам кузатиб бормоқдамиз. Америка халқининг танловини ҳурмат қиламиз ва Байден ҳамда Харрисни табриклаймиз», — дейди Венбин.
Трамп сайлов натижалари устидан судга шикоят қилишни бошлагани сабаб Хитой ҳозирга қадар ҳолатга изоҳ бермай келаётган давлатлардан бири эди.
«Биз АҚШдаги президентлик сайловлари натижаси Америка қонунлари ва процедуралари орқали аниқланишини тушунамиз», — дейди Хитой ТИВ вакили.
Мазкур баёнот АҚШнинг амалдаги президенти Дональд Трамп 2021 йил 11 январдан бошлаб Хитойнинг ҳарбий саноат комплексларига боғлиқ компанияларнинг қимматли қоғозларини америкалик жисмоний ва юридик шахслар томонидан харид қилинишини тақиқловчи қарорни имзолаганидан сўнг билдирилган.
Трампнинг фикрича, Америка инвестициялари Хитойга ўзининг мудофаа имкониятларини мустаҳкамлаб олишга ва «тўғридан-тўғри АҚШга хавф туғдиришга» ёрдам беради.
Аввалроқ Туркия президенти Ражаб Тоййиб Эрдўғон ва БМТ бош котиби Антониу Гутерриш, Жанубий Корея президенти Мун Чже Ин Жо Байденни АҚШ президентлиги сайловидаги ғалаба билан табриклаган эди. Россия президентининг матбуот котиби Дмиртий Песков эса Путин «сайлов натижалари расман эълон қилинганидан кейин» табриклашини билдирган.
Мавзуга доир:
- Дональд Трамп Жо Байденга ҳокимиятни топширишдан бош тортди. Аммо демократнинг жамоаси ҳокимият транзитига тайёрланишни бошлади
- Сайловлардаги мағлубиятдан сўнг Трампга нима бўлади? У Оқ уйдан тўғри қамоққа равона бўлиши ростми? Ўзини ўзи афв этишга улгурадими? Унинг келажагига оид саволларга жавоблар
Изоҳ (0)