Европа Иттифоқи Pfizer ва BioNTech вакциналаридан 300 млн доза сотиб олмоқчи
Европа комиссияси Германиянинг BioNTech фармацевтика компанияси ва унинг америкалик ҳамкори Pfizer’дан 300 миллион доза вакцина сотиб олишни режалаштирмоқда. «РБК»нинг хабар беришича, бу ҳақда Европа комиссияси раҳбари Урсула фон дер Ляйен Twitter’да маълум қилди.
«COVID-19 вакцинаси сўнгги клиник синовларининг муваффақиятли натижалари тўғрисида Pfizer ва BioNTech’дан ажойиб янгилик. Европа илми иш бермоқда! Яқинда Европа комиссияси улар билан 300 миллион доза бўйича шартнома имзолайди», — деб ёзган Еврокомиссия раҳбари.
Pfizer маълумотларига кўра, препарат 90 фоиздан юқори самарадорликни кўрсатган: тадқиқотнинг 43 мингдан ортиқ иштирокчисининг атиги 94 нафари коронавирус билан касалланган. Компанияда таъкидланишича, вакцина икки босқичда қўлланилади ва инъекциядан 28 кун ўтиб COVID-19’дан ҳимоя қилишни бошлайди. Шу йилнинг охирига қадар Pfizer ва BioNTech препаратдан 50 миллион доза, 2021 йилда яна 1,3 миллиард доза ишлаб чиқаришни режалаштирмоқда.
Мавзуга доир: АҚШнинг Pfizer компанияси томонидан яратилган коронавирусга қарши вакцина 90 фоиз самарадорлик кўрсатгани маълум қилинди
«Спутник» вакцинасини ишлаб чиққан Россиянинг Гамалея номидаги марказ раҳбари Александр Гринсбург Pfizer ва BioNTech томонидан ўтказилган препарат синов натижаларига муносабат билдириб, «дунёда қанча кўп вакцина бўлса, одамлар шунча яхши ҳимояланади», деб айтган.
Россия Соғлиқни сақлаш вазирлигининг терапия ва умумий тиббий амалиёт бўйича бош мутахассиси Оксана Драпкина коронавирус инфекциясига қарши яна бир самарали вакцина пайдо бўлишини «хушхабар» деб атади. Унинг айтишича, Россиянинг «Спутник V» препарати самарадорлиги ҳам 90 фоиздан юқори.
Аввалроқ АҚШ ҳукумати BioNTech ва Pfizer компанияларига COVID-19 коронавирус инфекциясига қарши 100 миллион доза БНТ162 вакцинасини буюртма қилгани ҳақида хабар берилганди.
Япония ҳукумати ҳам Pfizer ва BioNTech’нинг вакцина ишлаб чиқариш ишлари муваффақиятли ўтганидан сўнг ҳар бир компаниядан 120 миллион дозада вакцина сотиб олмоқчи.
Мавзуга доир: Билл Гейтс коронавирусга қарши дастлабки вакциналар самарадорлиги идеал бўлмаслиги мумкинлигини айтди
