Россиядан ичида тинчликпарвар кучлари бўлган дастлабки олтита самолёт Тоғли Қорабоғ томон йўл олди. Бу ҳақда Россия Мудофаа вазирлигига таяниб, «РБК» хабар берди.
«Ҳарбий транспорт авиациясининг бортида россиялик тинчликпарвар кучлари бўлган олтита ИЛ-76 самолётлари Ульянов-Восточний аэродромидан кўтарилди», — дейилади идора хабарида.
Самолётлар бортида шахсий таркиб, моддий воситалар ва автомобиль техникалари мавжуд. Шунингдек, бошқа самолётлар билан зирҳли транспортёрлар ҳам юборилган.
Аввалроқ Арманистон, Озарбайжон ва Россия можаро зонада ҳарбий ҳаракатларни тўхтатиш бўйича қўшма баёнотни имзолаган эди. Ҳужжатга кўра, Тоғли Қорабоғга россиялик тинчликпарвар кучлар киритилади.
Келишувга кўра, Қорабоғдаги кесишув чизиғи ва Лочин каридори яқинида 90 та зирҳли транспортёр, шунингдек, 380 та автомобиль ва махсус техникага эга 1960 нафар россиялик ҳарбий хизматчидан иборат Россия контингенти жойлаштирилади.
Эслатиб ўтамиз, Тоғли Қорабоғдаги Озарбайжон ва Арманистон ўртасидаги можаро 27 сентябрдан буён давом этаётганди. 31 октябрь куни Россия Ташқи ишлар вазирлиги Арманистон бош вазири Никол Пашиняннинг Россия президенти Владимир Путинга қилган мурожаати муносабати билан агар тўқнашувлар тўғридан-тўғри Арманистон ҳудудига ўтказилса, Россия расмий Ереванга ёрдам беришини маълум қилганди.
Арманистон бош вазири Никол Пашинян Германиянинг АRD телеканалига берган интервьюсида Қорабоғ низоси ҳудудига бошқа мамлакатлардан эмас, Россиядан тинчликпарварларнинг киритилиши энг самаралиси бўлиши мумкинлигини айтган.
9 ноябрь куни Россиянинг Ми-24 вертолёти Озарбайжон армияси томонидан уриб туширилган. Озарбайжон ҳодиса тасодифан юз берганини маълум қилди ва бунинг учун узр сўраган.
Изоҳ (0)