Арманистон Бош штаби Қорабоғдаги сулҳ қарорини қўллаб-қувватлади. Президент «сиёсий маслаҳатлашувлар» бошланишини эълон қилди

Арманистон Мудофаа вазирлиги ва Бош штаби Тоғли Қорабоғдаги қон тўкилишларини тўхтатишга чақирган мурожаатини эълон қилди, деб хабар беради Meduza. Арман ҳарбийлари бу каби мурожаатни Арманистон ва Озарбайжон ҳукумати Россия воситачилигида Қорабоғдаги урушни тўхтатиш бўйича имзолаган битимидан бир неча соат ўтиб билдирган.

«Арманистон, Россия ва Озарбайжоннинг сиёсий раҳбарияти барчангиз мазмуни билан танишган келишувга эришди. Уруш бутунлай тўхтагани йўқ ва Арсахдаги жанговар ҳаракатлар давом этмоқда. Шунга қарамай, биз мамлакатимизнинг ҳарбий-сиёсий раҳбариятини қарорини бажаришга ва ҳимоя қилишга мажбурмиз», — дейилади хабарда.

Арманистон президенти Армен Саркисяннинг маълум қилишича, у урушни тўхтатиш ва унинг шартлари бўйича имзоланган битим тўғрисида «матбуот орқали» хабар топган.

Армен Саркисяннинг сўзларига кўра, урушнинг тўхтатилиши тўғрисидаги битим «ҳар томонлама консультация ва муҳокама предметига» айланиши керак. У «миллий манфаатларни ҳимоя қилиш бўйича кун тартибидан келиб чиқадиган қарорларга иложи борича тезроқ келишиб олиш учун» сиёсий консультациялар ташаббуси билан чиқаётганини билдирган.

Эслатиб ўтамиз, Арманистон, Озарбайжон ва Россия етакчилари 9 ноябрь куни кечқурун Қорабоғда жангларни тўхтатиш ҳақида уч томонлама шартнома имзолади. Сулҳ шартлари Келбажар, Агдам, Лачин туманлари ва Газах туманида Арманистон томони эгаллаб турган ҳудудлар Озарбайжон назорати остига берилишини назарда тутади.

Уруш тугагани эълон қилингач, Арманистонда норозиликлар бошланган. Ереванда Арманистон парламенти биноси ёнида норозилик намойишларини уюштираётганлар Миллий мажлис спикери Арарат Мирзоянни дўппослаган.