Yevropa Ittifoqi Pfizer va BioNTech vaksinalaridan 300 mln doza sotib olmoqchi

Yevropa komissiyasi Germaniyaning BioNTech farmatsevtika kompaniyasi va uning amerikalik hamkori Pfizer’dan 300 million doza vaksina sotib olishni rejalashtirmoqda. “RBK”ning xabar berishicha, bu haqda Yevropa komissiyasi rahbari Ursula fon der Lyayen Twitter’da ma’lum qildi.

“COVID-19 vaksinasi so‘nggi klinik sinovlarining muvaffaqiyatli natijalari to‘g‘risida Pfizer va BioNTech’dan ajoyib yangilik. Yevropa ilmi ish bermoqda! Yaqinda Yevropa komissiyasi ular bilan 300 million doza bo‘yicha shartnoma imzolaydi”, — deb yozgan Yevrokomissiya rahbari.

Pfizer ma’lumotlariga ko‘ra, preparat 90 foizdan yuqori samaradorlikni ko‘rsatgan: tadqiqotning 43 mingdan ortiq ishtirokchisining atigi 94 nafari koronavirus bilan kasallangan. Kompaniyada ta’kidlanishicha, vaksina ikki bosqichda qo‘llaniladi va inyeksiyadan 28 kun o‘tib COVID-19’dan himoya qilishni boshlaydi. Shu yilning oxiriga qadar Pfizer va BioNTech preparatdan 50 million doza, 2021-yilda yana 1,3 milliard doza ishlab chiqarishni rejalashtirmoqda.

“Sputnik” vaksinasini ishlab chiqqan Rossiyaning Gamaleya nomidagi markaz rahbari Aleksandr Grinsburg Pfizer va BioNTech tomonidan o‘tkazilgan preparat sinov natijalariga munosabat bildirib, “dunyoda qancha ko‘p vaksina bo‘lsa, odamlar shuncha yaxshi himoyalanadi”, deb aytgan.

Rossiya Sog‘liqni saqlash vazirligining terapiya va umumiy tibbiy amaliyot bo‘yicha bosh mutaxassisi Oksana Drapkina koronavirus infeksiyasiga qarshi yana bir samarali vaksina paydo bo‘lishini “xushxabar” deb atadi. Uning aytishicha, Rossiyaning “Sputnik V” preparati samaradorligi ham 90 foizdan yuqori.

Avvalroq AQSh hukumati BioNTech va Pfizer kompaniyalariga COVID-19 koronavirus infeksiyasiga qarshi 100 million doza BNT162 vaksinasini buyurtma qilgani haqida xabar berilgandi.

Yaponiya hukumati ham Pfizer va BioNTech’ning vaksina ishlab chiqarish ishlari muvaffaqiyatli o‘tganidan so‘ng har bir kompaniyadan 120 million dozada vaksina sotib olmoqchi.