Англиянинг Линкольншир графлигида яшовчи аёлнинг Чико исмли ити унинг қонига кирган зарарли микроблар туфайли бутун организмни заҳарлайдиган хавфли касалликни сезиб қолган ва ҳаётини қутқариб қолган. Бу ҳақда Daily Mail хабар беради.
2018 йилнинг февраль ойида 20 ёшли Леви Картер гўзаллик салонига сочини сариқ рангга бўяш учун борган. Леви бошига водород пероксид бўёғини суртилганида куйиш ҳиссини сезган ва нимадир нотўғри бўлганини англаган. «Сочларим бўялганидан сўнг стилист бошимни қайтадан плёнкага ўради, бошим чиндан ҳам қаттиқ оғрир ва туташни бошлаганди. Сўнгра у бошимни 20 дақиқа давомида муздек сувда ювди», − дейди у.
Салон ходимлари Левининг сочини бошқа рангга бўяши ва бунинг учун чегирма қилишини таклиф этган. Шундан сўнг Леви сочини ёрқин қизғиш рангга бўяшига рози бўлган.
«Ўша куни кечки пайт дўстларим билан эдим, аммо менда қандайдир оғриқ бор эди. Маълум бўлишича, бош терисида ҳали ҳам водород пероксид қолдиқлари қолган бўлиб, у терини куйдираётган экан», − дейди Леви. У ўша заҳоти тиббий ёрдамга мурожаат қилган. Тиббиёт ходимлари аёлга антибиотиклар берган ва шу орқали даво топишига умид қилган.
Кейинги тўрт ҳафта мобайнида Левининг бошида куйиш давом этган ва ўтган вақт оғриқсиз кечмаган. Аммо унинг Чико исмли ити негадир ўзини бошқача тута бошлаган. «Чико мени тарк этмади. У ниманидир олдиндан сезаётган эди. Натижада ўзим ҳам жароҳатларнинг ҳидини сеза бошладим ва шифохонага бордим», − дейди инглиз аёл.
Шифокор томонидан Левига сепсис − қонга кирган зарарли микроблар туфайли бутун организмнинг заҳарланиши ташхиси қўйилган. Шунингдек, шифокорлар беморга касаллик жиддийлашмасидан аввал ўз вақтида келганини маълум қилган. Бу жуда хавфли касаллик, аммо вақтида кўрилган чоралар билан осонликча даволаш мумкин. Шунингдек, ҳар бир кечикиш ўлим эҳтимолини саккиз фоизга оширади.
Бемор уч ҳафта мобайнида томчилатиб томирга дори қуйиш муолажасини олган. Левининг бош қисмида куйган жойлар тузалишни бошлаган бўлса-да, аммо соч тухумдонлари етказилган зарар жуда оғир, бундан ташқари унинг боши терисида айрим жойлар сочсиз қолган эди.
Аста-секин саломатлиги тикланаётган аёл бундан сўнг соч бўёқларини ишлатишдан аввал уни синовдан ўтказиш кераклиги, бу ҳалокатли оқибатларнинг олдини олишга ёрдам беришини таъкидлайди. «Чико мени вақтида ҳаракат қилишимга ёрдам берганидан хурсандман. Акс ҳолда бугун мен қаерда бўлишим ва ҳаттоки бўлмаслигим ҳам мумкин эди», − дея сўзини якунлайди Леви.
Изоҳ (0)