Тайванлик йигит севимли таоми — товуқ филеси ҳақида сўз борганидан сўнг икки ойлик комадан чиқди, — деб хабар беради Taiwan News.
Чиу исмли 18 ёшли йигит скутерда жиддий йўл-транспорт ҳодисасига учраган. Аниқлик киритилишича, тўқнашув оқибатида унинг бир неча тана аъзоларига жиддий зарар етган, жумладан, талоқ, ўнг буйрак ва жигарига. Фавқулодда ҳолатда шифохонага етказилган йигитга шифокорлар учинчи даражадаги кома ташхисини қўйган.
Чиу жами бўлиб олтита операцияни бошидан ўтказган. Касалхонадаги ҳамширанинг сўзларига кўра, бемор оиласи билан бирга мунтазам «ўлим жанги билан курашган». Навбатдаги ташрифларнинг бирида беморнинг акаси ҳазиллашиб, энг севимли таомини — товуқ филесини емоқчи эканлигини айтган. Ушбу сўзлардан сўнг Чиунинг юрак уриши тезлашиб, ўзига кела бошлаган. Унинг ҳаёт кўрсаткичлари кутилмаганда барқарорлашган.
Айни вақтда тайванлик йигитга шифохонадан жавоб берилган. Яқинда у касалхонага келиб, тиббиёт ходимларига миннатдорчилик сифатида торт берган.
Аввалроқ Буюк Британия фуқароси комадан чиқиб, 20 йиллик ҳаётини унутиб қўйгани, у ўз яқинларини ўғрилар деб ҳисоблагани ва шифокорларни ҳозир 1998 йил эканлигига ишонтиришга урингани тўғрисида хабар берилганди.
Изоҳ (0)