Angliyaning Linkolnshir grafligida yashovchi ayolning Chiko ismli iti uning qoniga kirgan zararli mikroblar tufayli butun organizmni zaharlaydigan xavfli kasallikni sezib qolgan va hayotini qutqarib qolgan. Bu haqda Daily Mail xabar beradi.
2018-yilning fevral oyida 20 yoshli Levi Karter go‘zallik saloniga sochini sariq rangga bo‘yash uchun borgan. Levi boshiga vodorod peroksid bo‘yog‘ini surtilganida kuyish hissini sezgan va nimadir noto‘g‘ri bo‘lganini anglagan. “Sochlarim bo‘yalganidan so‘ng stilist boshimni qaytadan plyonkaga o‘radi, boshim chindan ham qattiq og‘rir va tutashni boshlagandi. So‘ngra u boshimni 20 daqiqa davomida muzdek suvda yuvdi”, − deydi u.
Salon xodimlari Levining sochini boshqa rangga bo‘yashi va buning uchun chegirma qilishini taklif etgan. Shundan so‘ng Levi sochini yorqin qizg‘ish rangga bo‘yashiga rozi bo‘lgan.
“O‘sha kuni kechki payt do‘stlarim bilan edim, ammo menda qandaydir og‘riq bor edi. Ma’lum bo‘lishicha, bosh terisida hali ham vodorod peroksid qoldiqlari qolgan bo‘lib, u terini kuydirayotgan ekan”, − deydi Levi. U o‘sha zahoti tibbiy yordamga murojaat qilgan. Tibbiyot xodimlari ayolga antibiotiklar bergan va shu orqali davo topishiga umid qilgan.
Keyingi to‘rt hafta mobaynida Levining boshida kuyish davom etgan va o‘tgan vaqt og‘riqsiz kechmagan. Ammo uning Chiko ismli iti negadir o‘zini boshqacha tuta boshlagan. “Chiko meni tark etmadi. U nimanidir oldindan sezayotgan edi. Natijada o‘zim ham jarohatlarning hidini seza boshladim va shifoxonaga bordim”, − deydi ingliz ayol.
Shifokor tomonidan Leviga sepsis − qonga kirgan zararli mikroblar tufayli butun organizmning zaharlanishi tashxisi qo‘yilgan. Shuningdek, shifokorlar bemorga kasallik jiddiylashmasidan avval o‘z vaqtida kelganini ma’lum qilgan. Bu juda xavfli kasallik, ammo vaqtida ko‘rilgan choralar bilan osonlikcha davolash mumkin. Shuningdek, har bir kechikish o‘lim ehtimolini sakkiz foizga oshiradi.
Bemor uch hafta mobaynida tomchilatib tomirga dori quyish muolajasini olgan. Levining bosh qismida kuygan joylar tuzalishni boshlagan bo‘lsa-da, ammo soch tuxumdonlari yetkazilgan zarar juda og‘ir, bundan tashqari uning boshi terisida ayrim joylar sochsiz qolgan edi.
Asta-sekin salomatligi tiklanayotgan ayol bundan so‘ng soch bo‘yoqlarini ishlatishdan avval uni sinovdan o‘tkazish kerakligi, bu halokatli oqibatlarning oldini olishga yordam berishini ta’kidlaydi. “Chiko meni vaqtida harakat qilishimga yordam berganidan xursandman. Aks holda bugun men qayerda bo‘lishim va hattoki bo‘lmasligim ham mumkin edi”, − deya so‘zini yakunlaydi Levi.
Izoh (0)