Ўзбекистон Қирғизистоннинг барқарор ривожланиш йўлидаги интилишини ҳар томонлама қўллаб-қувватлайди. Бу ҳақда Президент Шавкат Мирзиёев Шанхай ҳамкорлик ташкилотига аъзо давлатлар раҳбарлари кенгаши саммитида билдирди.
«Саммитимизда ҳурматли Садир Нурхўжаевич Жапаровни (Қирғизистон президенти вазифасини бажарувчи — «Дарё» изоҳи) кўриб турганимдан хурсандман. Ўзбекистон, яқин қўшни ва стратегик ҳамкор сифатида, биродар Қирғизистоннинг халқининг барқарор ривожланиш ва фаровонлик йўлидаги интилишини ҳар томонлама қўллаб-қувватлайди», — деган Президент.
Шанхай ҳамкорлик ташкилотига аъзо давлатлар раҳбарлари кенгашининг мажлиси 10 ноябрь куни видеоанжуман шаклида ўтказилди. Россия раислигида ўтказилган ушбу учрашув кун тартибидан янги глобал хатар ва таҳдидларнинг кучайиши шароитида ШҲТ доирасидаги кўп қиррали ҳамкорликни янада мустаҳкамлаш масалалари ўрин олган.
Маълумот учун, Садир Жапаров 15 октябрь куни Сўронбай Жээнбеков Қирғизистон президентлиги лавозимидан истеъфога чиққач, Қонунчилик кенгаши спикери Канат Исаев давлат раҳбарининг вазифаларини вақтинча бажаришни рад этганидан сўнг президент вазифасини бажарувчига айланди. У мамлакат у мамлакат раҳбари вазифасини бажарувчи ваколатларини декабрь ойида топширади. Қирғизистонда муддатидан олдинги президентлик сайловлари 2021 йилнинг 10 январида бўлиб ўтади.
Аввалроқ Ўзбекистон ташқи ишлар вазири Абдулазиз Комилов Қирғизистон ТИВ раҳбари Руслан Казакбаев билан учрашиб, сиёсий, савдо-иқтисодий, инвестиция, транспорт-коммуникация, сув хўжалиги ва маданий-гуманитар соҳаларда Ўзбекистон–Қирғизистон ҳамкорлигининг ҳозирги ҳолати ва уни янада ривожлантириш истиқболларини муҳокама қилган хабар берилган эди.
Шу куни Руслан Казакбаев Ўзбекистон бош вазири Абдулла Арипов билан ҳам учрашди. Учрашувда савдо-иқтисодий, сармоявий, транспорт-логистика, маданий-гуманитар соҳалардаги ҳамкорликнинг бугунги ҳолати ва истиқболлари ҳамда пандемиянинг икки томонлама алоқаларга салбий оқибатларини бартараф этиш масалалари муҳокама қилинди.
Изоҳ (0)