Давлат хавфсизлик хизмати ва департамент ходимларининг Сирдарё вилоятида тезкор тадбири ўтказди, дея хабар бермоқда «Kun.uz».
Тадбирда вилоят кардиология диспансерида бош ҳисобчи лавозимида ишловчи шахс маҳаллий фуқарони Қозоғистондаги танишлари орқали Чимкент шаҳридаги олий таълим муассасасининг иқтисодиёт йўналишига ўқишга киритиб қўйиш эвазига ундан 2700 АҚШ доллари олган вақтида ушланди.
Шу билан бирга, ДХХ Самарқанд вилояти бошқармаси ва Бош прокуратура ҳузуридаги департаментнинг ҳудудий бошқармаси ҳамкорлигида Самарқанд шаҳрида ўтказилган тезкор тадбир давомида Самарқанд Иқтисодиёт ва сервис институти ходими 4 минг АҚШ доллари олган вақтида ашёвий далиллар билан ушланди.
У мазкур пул маблағи эвазига танишларининг ёрдами орқали фуқарони Россиянинг Қозон Федерал университетининг туризм факультетига ўқишга киритиб қўйишни ваъда қилган.
Ҳозирда аниқланган ҳолатлар юзасидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.
Аввалроқ Самарқандда коллежга киритиб қўйиш эвазига фуқародан 400 доллар олаётган шахс, Бухорода ЙҲХБ ходимига 400 минг сўм пора бермоқчи бўлган ҳайдовчи ҳамда Тошкентда жарима тўламаслик эвазига фуқародан 300 доллар сўраган газ таъминоти идораси ходимлари қўлга олингани ҳақида хабар берилганди.
Изоҳ (0)