Qirg‘izistonda muddatidan oldingi prezidentlik saylovlari 2021-yilning 10-yanvar kuni bo‘lib o‘tadi. Bu haqda Markaziy saylov komissiyasi qaroriga tayanib, “24.kg” xabar berdi.
Foto: CA-Irnews
Markaziy saylov komissiyasi raisi Nurjan Shayldabekovaning ta’kidlashicha, qonun bo‘yicha agarda Yuqori Kengash davlat rahbari vakolatlari tugaganidan keyin bir hafta ichida muddatidan oldingi prezidentlik saylovlarini o‘tkazish sanasi belgilamasa, ushbu muddatning ertasi kuni rasmiy belgilangan kun hisoblanadi.
“Shundan so‘ng saylov komissiyasi ikki kun ichida saylovlarni o‘tkazilish sanasini rasman e’lon qiladi. Qonunchilikka ko‘ra, u davlat rahbari vakolatlari tugatilganidan keyingi uch oy ichida o‘tkazilishi kerak — 2021-yil 16-yanvarga qadar”, — deydi MSK raisi.
Nurjan Shayldabekovaning qo‘shimcha qilishicha, saylovlar odatda dam olish kunlari o‘tkazilgani sabab ushbu sanani 10-yanvarga ko‘chirish taklif etilmoqda. Markaziy saylov komissiyasi a’zolari ushbu taklifni qo‘llab-quvvatlagan.
Avvalroq Qirg‘iziston parlamenti prezidentlik saylovlari o‘tkaziladigan sanani belgilay olmagani to‘g‘risida xabar berilgandi.
Eslatib o‘tamiz, 15-oktabr kuni So‘ronbay Jeenbekov Qirg‘iziston prezidentligi lavozimidan iste’fo berganini e’lon qildi. U bosh vazir Sadir Japarov va boshqa siyosatchilardan o‘z tarafdorlarini poytaxtdan olib chiqib ketishni so‘ragan va ulardan bishkekliklar tinchligini buzmaslikni iltimos qilgan. 16-oktabr kuni parlament majlisida Qonunchilik kengashi spikeri Kanat Isayev davlat rahbarining vazifalarini vaqtincha bajarishni rad etgan. Yakunda bosh vazir Sadir Japarov prezident vazifasini bajaruvchiga aylandi.
