Ўзбекистон ва Қирғизистон икки томонлама йиллик товар айланмаси ҳажмини яқин йилларда 1 миллиард долларга етказиш мақсадида савдо тўсиқларини бартараф этиш бўйича ўзаро самарадор ҳамкорликка тайёр.
Бу ҳақда 5 ноябрь куни бош вазир ўринбосари — инвестициялар ва ташқи савдо вазири Сардор Умурзоқовнинг Қирғизистон ташқи ишлар вазири Руслан Казакбаев билан учрашувида айтди, деб хабар бермоқда вазирлик матбуот хизмати.
Томонлар икки томонлама ҳамкорликнинг кун тартибини, илгари эришилган келишувларни амалга оширишни ҳамда савдо, инвестиция, саноат кооперацияси, транспорт соҳасидаги ўзбек-қирғиз шериклигини кенгайтириш истиқболларини, шунингдек, таълим, соғлиқни сақлаш ва маданият соҳаларидаги ўзаро алоқаларни муҳокама қилди.
Ўзбекистон ва Қирғизистон ўртасида саноат кооперацияси соҳасида ҳамкорликни кенгайтириш ва чуқурлаштириш бўйича «Йўл харитаси»ни ишлаб чиқиш, келишиш ҳамда уни амалга ошириш жараёнини жадаллаштириш тўғрисида келишувга эришилди.
Ҳукуматлараро комиссия ишини ҳамда Ўзбекистон ва Қирғизистоннинг чегараолди вилоятлари маъмурият раҳбарлари кенгаши фаолиятини кучайтириш тўғрисида келишиб олинди.
Мулоқот давомида транспорт-логистика соҳасидаги ҳамкорликни янада ривожлантириш истиқболлари ҳам таъкидланди, бунинг учун ҳар икки мамлакатнинг тегишли вазирлик ва идоралари таркибида махсус ишчи гуруҳ тузишга келишиб олинди.
Ишчи гуруҳнинг диққат марказида юклар ташиш ҳажмини янада ошириш, минтақавий транспорт йўлакларидан фойдаланиш самарадорлигини кучайтириш бўйича аниқ таклифларни, шунингдек, транспорт секторидаги долзарб масалаларни ишлаб чиқиш, қўшма логистика марказларини яратиш ҳамда автомобиль ва темир йўл инфратузилмасини модернизация қилиш бўйича қўшма лойиҳаларни амалга ошириш бўлади.
Эслатиб ўтамиз, Қирғизистон Ташқи ишлар вазири Руслан Казакбаев бошчилигидаги делегация 5—6 ноябрь кунлари амалий ташриф билан Ўзбекистонда бўлиши хабар берилган эди. 5 ноябрь куни Ўзбекистон ташқи ишлар вазири Абдулазиз Комилов Руслан Казакбаев билан учрашиб, сиёсий, савдо-иқтисодий, инвестиция, транспорт-коммуникация, сув хўжалиги ва маданий-гуманитар соҳаларда Ўзбекистон–Қирғизистон ҳамкорлигининг ҳозирги ҳолати ва уни янада ривожлантириш истиқболларини муҳокама қилди.
Шу куни Руслан Казакбаев Ўзбекистон бош вазири Абдулла Арипов билан ҳам учрашди. Учрашувда савдо-иқтисодий, сармоявий, транспорт-логистика, маданий-гуманитар соҳалардаги ҳамкорликнинг бугунги ҳолати ва истиқболлари ҳамда пандемиянинг икки томонлама алоқаларга салбий оқибатларини бартараф этиш масалалари муҳокама қилинди.
Изоҳ (0)