Сирдарё вилояти Боёвут туманида 1937-1950 йилларда Ўзбекистон Компартияси Марказий Комитетининг биринчи котиби лавозимида ишлаган Усмон Юсуповга бюст ўрнатилди, дея хабар бермоқда ЎзА.
Қайд этилишича, 5 ноябрь куни Сирдарё вилоятининг Боёвут туманида Усмон Юсуповга ўрнатилган бюстнинг тантанали очилиш маросими бўлиб ўтди.
Бюст Усмон Юсупов раҳбарлик лавозимидан кетгандан кейинги тақдири билан боғлиқ бўлган Боёвут туманидаги колхозда ўзи яшаган ҳовлининг марказида очилди. Усмон Юсупов 1955-1960 йилларда 4-Боёвут совхозида раҳбар бўлиб ишлаган.
Тантанали маросимни Сирдарё вилояти ҳокими Ғофир Мирзаев очиб берди ва бутун Сирдарё халқи номидан Усмон Юсуповнинг Иккинчи жаҳон урушидаги буюк ғалабага ҳамда Сирдарё вилоятининг гуллаб-яшнашига қўшган ҳиссаси учун миннатдорлигини баён қилди.
Тадбирда Усмон Юсупов ҳақига Қуръон тиловат қилинди. Шундан сўнг бошланган конференцияда у билан бевосита бирга ишлаган меҳнат фахрийлари ёшликдаги хотиралари билан ўртоқлашди.
Усмон Юсупов раҳбарлик қилган 4-Боёвут совхозида илк фаолиятини бошлаган давлат ва жамоат арбоби Азиз Тўраев у билан ўтган даврларини хотирлаб, халқ орасида Усмон ота номини олишига сабаб бўлган хислатларига тўхталди.
Усмон Юсуповнинг қизи Зоя Петросенко Москва шаҳридан карантин сабаб келолмай қолганлиги боис Ўзбекистон халқидан миннатдорчилик изҳорларини аудиоёзув орқали жўнатди. Конференцияда йиғилганларга қўйиб эшиттирилган ушбу аудиоёзувда Зоя Петросенко отасининг номи қайта оқланганидан, ҳақиқат қарор топганидан бениҳоя хурсанд эканлигини ҳам баён этган.
Конференция сўнггида меҳнат фаолиятини Усмон Юсупов қўл остида бошлаб, кўп йиллар Сирдарё вилояти ва республикада раҳбарлик лавозимларида ишлаган давлат ва жамоат арбоби Азиз Тўраев вилоят ҳокимлиги томонидан тақдирланди.
Азиз Тўраевнинг кўп йиллик юрт олдидаги меҳнатлари қадрланган ҳолда унга «Президент совғаси» – автомашина берилди.
Маълумот учун, Усмон Юсупов 1900 йил 1 март куни Фарғона туманидаги Каптархона қишлоғида туғилган. Ўзбекистон Компартияси Марказий Комитети котиби (1928–31), ВССПС Ўрта Осиё бюроси раиси (1931–34), Ўзбекистон ССР Озиқ-овқат саноати халқ комиссари (1936–37), Ўзбекистон Компартияси МК 1-котиби (1937–50), СССР Пахтачилик министри (1950–53), Ўзбекистон ССР Министрлар Совети раиси (1953–54), Мирзачўлдаги 4-Боёвут ва 2-Боёвут совхозлари ва Янгийўл туманидаги «Халқобод» аграр-саноат бирлашмаси директори (1955-66) бўлиб ишлаган.
Юсупов республикага раҳбар бўлган йилларда Ўзбекистонда халқ ҳашари йўли билан йирик сув иншоотлари (Катта Фарғона канали, Каттақўрғон сув омбори) қурилган. 2-жаҳон уруши даврида мамлакат ғарбидан кўчириб келтирилган корхоналарни ишга тушириш, янгиларини қуриш, фронтни озиқ-овқат, кийим-кечак билан мунтазам таъминлаш, ўзбекистонликларни фашизмга қарши курашга сафарбар қилиш, уруш туфайли уй-жой ва бошпанасиз қолган аҳоли ҳамда етим қолган болаларга меҳрибонлик ва инсонпарварлик қилишда Юсупов бош-қош бўлган.
У 1966 йил 7 май куни Тошкент шаҳрида вафот этган.
Изоҳ (0)