O‘zbekiston va Qirg‘iziston ikki tomonlama yillik tovar aylanmasi hajmini yaqin yillarda 1 milliard dollarga yetkazish maqsadida savdo to‘siqlarini bartaraf etish bo‘yicha o‘zaro samarador hamkorlikka tayyor.
Bu haqda 5-noyabr kuni bosh vazir o‘rinbosari — investitsiyalar va tashqi savdo vaziri Sardor Umurzoqovning Qirg‘iziston tashqi ishlar vaziri Ruslan Kazakbayev bilan uchrashuvida aytdi, deb xabar bermoqda vazirlik matbuot xizmati.
Tomonlar ikki tomonlama hamkorlikning kun tartibini, ilgari erishilgan kelishuvlarni amalga oshirishni hamda savdo, investitsiya, sanoat kooperatsiyasi, transport sohasidagi o‘zbek-qirg‘iz sherikligini kengaytirish istiqbollarini, shuningdek, ta’lim, sog‘liqni saqlash va madaniyat sohalaridagi o‘zaro aloqalarni muhokama qildi.
O‘zbekiston va Qirg‘iziston o‘rtasida sanoat kooperatsiyasi sohasida hamkorlikni kengaytirish va chuqurlashtirish bo‘yicha “Yo‘l xaritasi”ni ishlab chiqish, kelishish hamda uni amalga oshirish jarayonini jadallashtirish to‘g‘risida kelishuvga erishildi.
Hukumatlararo komissiya ishini hamda O‘zbekiston va Qirg‘izistonning chegaraoldi viloyatlari ma’muriyat rahbarlari kengashi faoliyatini kuchaytirish to‘g‘risida kelishib olindi.
Muloqot davomida transport-logistika sohasidagi hamkorlikni yanada rivojlantirish istiqbollari ham ta’kidlandi, buning uchun har ikki mamlakatning tegishli vazirlik va idoralari tarkibida maxsus ishchi guruh tuzishga kelishib olindi.
Ishchi guruhning diqqat markazida yuklar tashish hajmini yanada oshirish, mintaqaviy transport yo‘laklaridan foydalanish samaradorligini kuchaytirish bo‘yicha aniq takliflarni, shuningdek, transport sektoridagi dolzarb masalalarni ishlab chiqish, qo‘shma logistika markazlarini yaratish hamda avtomobil va temir yo‘l infratuzilmasini modernizatsiya qilish bo‘yicha qo‘shma loyihalarni amalga oshirish bo‘ladi.
Eslatib o‘tamiz, Qirg‘iziston Tashqi ishlar vaziri Ruslan Kazakbayev boshchiligidagi delegatsiya 5—6-noyabr kunlari amaliy tashrif bilan O‘zbekistonda bo‘lishi xabar berilgan edi. 5-noyabr kuni O‘zbekiston tashqi ishlar vaziri Abdulaziz Komilov Ruslan Kazakbayev bilan uchrashib, siyosiy, savdo-iqtisodiy, investitsiya, transport-kommunikatsiya, suv xo‘jaligi va madaniy-gumanitar sohalarda O‘zbekiston–Qirg‘iziston hamkorligining hozirgi holati va uni yanada rivojlantirish istiqbollarini muhokama qildi.
Shu kuni Ruslan Kazakbayev O‘zbekiston bosh vaziri Abdulla Aripov bilan ham uchrashdi. Uchrashuvda savdo-iqtisodiy, sarmoyaviy, transport-logistika, madaniy-gumanitar sohalardagi hamkorlikning bugungi holati va istiqbollari hamda pandemiyaning ikki tomonlama aloqalarga salbiy oqibatlarini bartaraf etish masalalari muhokama qilindi.
Izoh (0)