Ўзбекистондаги мавжуд 17 та ихтисослашган республика тиббиёт марказларини ҳудудий тиббиёт муассасалари билан боғлаш зарур. Марказлардаги мураккаб жарроҳлик амалиётлари, янги диагностика ва даволаш услублари вилоят, туман ва шаҳар шифохоналарига трансляция қилиниши керак. Бу ҳақда айни пайтда Шавкат Мирзиёев раислигида ўтказилаётган видеоселектор йиғилишида таъкидланди, дея хабар бермоқда «Дарё» мухбири.
Мажлисда давлат раҳбари Тошкент шаҳар соғлиқни сақлаш тизими ҳақида ҳам сўз юритди.
«Тошкент шаҳрида шифокорлар билан таъминлаганлик даражаси 87 фоизни ташкил этади. Айниқса, 1 мингдан зиёд тор соҳа шифокорларига эҳтиёж мавжуд. Бугунги кунда пойтахтда 40 мингдан ортиқ тиббиёт ходими фаолият кўрсатиб, уларнинг иш ҳақига ҳар йили 850 миллиард сўм ажратилади. Энг оғир аҳвол Учтепа ва Олмазор туманларида бўлиб, тор соҳа шифокорлари етишмаслиги сабабли нафас йўллари, ошқозон-ичак касалликлари бўйича республикада энг юқори ўринларда туради.
Пойтахтда соғлиқни сақлаш тизими бутунлай изидан чиқиб кетган, тартиб, интизом, сўров йўқ. Аҳоли бундан бутунлай норози десак, бу ҳам ҳақиқат. Шаҳар шифохоналарида бирорта беморнинг иши, афсуски, пулсиз битмайди. Шунинг учун шаҳар соғлиқни сақлаш тизимига янги раҳбар тайинлаб, унинг мақоми вазир ўринбосари этиб белгиланди. Алимов, Ортиқхўжаев йил якунига қадар илғор хорижий мамлакатлар, хусусан, Туркиянинг соғлиқни сақлаш тизимини атрофлича ўрганиб, уни Тошкент шаҳрида жорий қилиш бўйича ўз таклифини беради», — деди Шавкат Мирзиёев.
Эслатиб ўтамиз, Ўзбекистон Президентининг тегишли қарори билан Республика ихтисослаштирилган эндокринология илмий-амалий тиббиёт маркази директори вазифасида ишлаб келаётган Анвар Алимов соғлиқни сақлаш вазирининг ўринбосари – Тошкент шаҳар соғлиқни сақлаш бош бошқармаси бошлиғи этиб тайинланди. Тошкент шаҳар Соғлиқни сақлаш бош бошқармасининг аввалги бошлиғи Ботир Исабеков август ойида мазкур лавозимни тарк этганди.
Изоҳ (0)