Австрия махсус хизматлари Венада теракт тайёрланаётганидан хабардор бўлгани маълум қилинди

Австрия контрразведкаси Венада тўрт кишини ўлдирган террорчининг аввалроқ Словакияда ноқонуний ўқ-дори сотиб олишга уринганидан хабардор бўлган. Бу ҳақда 5 ноябрь куни Австрия ички ишлар вазири Карл Нехаммер маълум қилди, деб ёзмоқда «Korrespondent.net».

Вазирнинг сўзларига кўра, кейинроқ Куйтим Фейзулай эканлиги маълум бўлган жиноятчи ўқ-дори излаб Словакияга борган, бироқ унинг қурол ишлатиш учун лицензияси бўлмагани сабабли рад жавобини олган.

Нехаммернинг қайд этишича, бу маълумот Австрия контрразведкасига маълум бўлган, бироқ прокурорларга етказилмаган. У ўзидан аввалги вазир Герберт Киклни контрразведка хизматига зарар етказганликда айблаган.

Шунингдек, вазирнинг таъкидлашича, аввалроқ бўлажак террорчи экстремизмда гумонланиб, Туркияда қўлга олинган ва Австрияга депортация қилинган.

Фейзулай 22 ойлик қамоқ жазосига ҳукм қилинганига қарамасдан, 11 ойдан кейин синов муддати билан озод қилинган.

Эслатиб ўтамиз, 2 ноябрь оқшомида содир бўлган Венадаги терактда тўрт киши ҳалок бўлган, 22 киши турли даражада жароҳат олган. Дастлаб полиция ҳужум уюштирганлардан бирини отиб ўлдиргани ҳақида хабар қилган. У 20 ёшли Фейзулай Куйтим бўлиб, Сурияга кетиб, ИШИД террорчиларига қўшилмоқчи бўлгани учун 22 ойлик қамоқ жазосига ҳукм қилинган бироқ, муддатидан илгари шартли озод қилинган. ИШИД ушбу теракт учун масъулиятни ўз зиммасига олган.