АҚШ президентлиги сайловида, тахминан, 60 минг америкалик рэпер Канье Уэст учун овоз берди. Бу ҳақда «Интерфакс» хабар қилди.
Уэстнинг адвокатлари унинг овоз беришда иштирок этиш имкониятига эришиши учун бир неча ой сарфлаган, рэпернинг ўзи эса ижтимоий тармоқлардаги 30 миллион обуначиси орасида ташвиқот ишларини олиб борган. Баъзи сўровлар рэперни аҳолининг 2 фоизи қўллаб-қувватлашини кўрсатган.
Камтарона натижасига қарамасдан, Уэст 2024 йилда бўлиб ўтадиган президентлик сайловида ўз номзодини яна бир марта илгари суришни режалаштирмоқда.
Канье Уэст сайловолди кампаниясини 2020 йилнинг ёзида бошлаган. Унинг номзоди фақат 12 та штатда овоз беришга қўйилган, у энг яхши натижани Теннеси штатида қўлга киритган — рэпер учун 10 мингдан ортиқ сайловчи ёки овоз берувчиларнинг 0,3 фоизи овоз берган.
Кане Уэстдан ташқари, АҚШ президентлиги сайловида ғалаба қозониш имконияти жуда кам бўлган бошқа номзодлар ҳам қатнашган. Жумладан, либертариан Жоан Жоргенсен, экология фаоли Хоун Хокинс, собиқ актёр Брук Пирс, Ислоҳотчи партия вакили Роке де ла Фуэнте Герра, ижтимоий ҳаракат фаоллари Глория Ла Рива ва Элисон Кеннеди сайловда ўз номзодларини қўйган.
Эслатиб ўтамиз, АҚШда президентлик сайлови 3 ноябрь куни бўлиб ўтди. Сайловда амалдаги президент Дональд Трамп ва демократлар вакили Жо Байден асосий рақиблар сифатида кураш олиб борди. Айни пайтда берилган овозларни санаш жараёнлари давом этмоқда.
Изоҳ (0)