АҚШ почта хизмати мамлакатда сайловлар кунигача 150 мингдан ортиқ бюллетенларни кўриб чиқишга улгурмай қолди, деб ёзади «Коммерсантъ». Уларнинг 12 мингдан зиёди ҳали АҚШ президенти сайловлари ғолиби аниқланмаган штатлар ҳиссасига тўғри келади.
Баъзи штатлар, хусусан, Невада, Шимолий Каролина ва Пенсильвания қонунлари 3 ноябрдан камида бир ҳафта аввал юборилган, аммо бу санадан кейин етиб келган бюллетенларни кўриб чиқиш имконини беради. Аммо Аризона ва Жоржияда 3 ноябрдан кейин келган бюллетенлар овозларни санашда ҳисобга олинмайди. АҚШ почта хизмати 5 ноябрь куни судга йўллаган аризасида 4 ноябрь куни бир кун аввалгидан кўпроқ бюллетенлар кўриб чиқилганини айтган.
Эслатиб ўтамиз, 3 ноябрь куни АҚШ президенти сайловлари бўлиб ўтди. Бу йил рекорд сонли америкаликлар почта орқали овоз берди, шу сабабли кўплаб штатларда овозларни ҳисоблаш жараёни узоқроқ давом этмоқда.
Трамп сайлов участкалари ёпилиб бўлганидан кейин келган бюллетенлар (почта орқали) ҳисобга олинмаслигини талаб қилмоқда. Айни пайтда унинг рақиби, АҚШ собиқ вице-президенти Жо Байден «ҳар битта овоз ҳисобга олиниши шарт»лигини таъкидламоқда.
АҚШнинг иккита штатидаги судлар амалдаги АҚШ президенти Дональд Трампнинг давлат раҳбари сайловларидаги овозларни ҳисоблаш юзасидан берган даъволарини рад этди.
Аввалроқ эса Европада хавфсизлик ва ҳамкорлик ташкилоти Америка президенти сайловлари чоғида қоидабузарликлар аниқланмаганини маълум қилганди. Ташкилот «амалдаги АҚШ президенти Дональд Трампнинг Америка президенти сайловлари чоғида қоидабузарликлар юз бергани ҳақидаги гаплари асоссиз ҳамда аҳолининг демократик институтларга нисбатан ишончини поймол қилади», — дея баёнот берган эди.
Демократлар партиясидан АҚШ президентлигига номзод Жо Байден эса овоз бериш натижаларини хотиржам кутишга чақирди.
Изоҳ (0)