Махсус прокурор идораси Дональд Трампнинг штаби сайловолди кампания чоғида Оқ уйдан ўз манфаатлари йўлида фойдалангани ҳолати юзасидан текширув бошлади. Бу ҳақда демократ конгрессмен Билл Паскрелл ўз Twitter’ида маълум қилди, деб ёзади «РБК».
Паскреллнинг сўзларига кўра, аввалроқ у махсус прокурор идорасига мурожаат қилиб, Трамп маъмурияти томонидан Хетч қонуни бузилиши ҳолати бўйича текширув ўтказишни талаб қилган. У ерда унга текширув бошланганини маълум қилишган.
«Махсус прокурор идораси бугун менга Трамп кампанияси Хетч қонунини бузган ҳолда Оқ уйдан сайлов куни штаб сифатида ҳамда зиёфатлар ўтказиш учун фойдалангани юзасидан текширув ўтказишларини маълум қилди», — деб ёзди Паскрелл.
Хетч қонуни 1939 йилда қабул қилинган. У президент ва вице-президентдан бошқа давлат хизматчиларига сайловларда номзодларни қўллаб-қувватлаб фикр билдиришни тақиқлайди. Агар федерал орган ходими Хетч қонунини бузса, унга ҳайфсан эълон қилинади ёки беш йилгача муддатда давлат муассасаларида ишлаш ҳуқуқидан маҳрум қилинган ҳолда ишдан бўшатилади.
Демократлар аввал ҳам Трамп маъмурияти аъзолари Хетч қонунини бузгани ҳақида бир неча марта маълум қилган. Сентябрда улар Республикачилар партиясининг сайловолди сезди сўнгги кунида президентнинг Оқ уйдан туриб онлайн форматда нутқ сўзлаш қарорини танқид остига олган эди.
Ўшанда назорат органи қонун бузилиш ҳолатларини аниқламаган эди. Оқ уй вакили Жадд Дир эса сезд доирасидаги барча тадбирлар Трамп кампанияси ва Республикачилар партияси Миллий қўмитаси вакиллари томонидан режалаштирилгани ва ўтказилганини таъкидлаган эди.
Эслатиб ўтамиз, 3 ноябрь куни АҚШ президенти сайловлари бўлиб ўтди. Бу йил рекорд сонли америкаликлар почта орқали овоз берди, шу сабабли кўплаб штатларда овозларни ҳисоблаш жараёни узоқроқ давом этмоқда.
Трамп сайлов участкалари ёпилиб бўлганидан кейин келган бюллетенлар (почта орқали) ҳисобга олинмаслигини талаб қилмоқда. Айни пайтда унинг рақиби, АҚШ собиқ вице-президенти Жо Байден «ҳар битта овоз ҳисобга олиниши шарт»лигини таъкидламоқда.
АҚШнинг иккита штатидаги судлар амалдаги АҚШ президенти Дональд Трампнинг давлат раҳбари сайловларидаги овозларни ҳисоблаш юзасидан берган даъволарини рад этди.
Изоҳ (0)