АҚШнинг амалдаги президенти Дональд Трамп фақатгина қонуний овозлар саналадиган бўлса, президентлик сайловларида ғолиб чиқишини маълум қилди. Оқ уйда ўтказилган брифингда у Демократлар партиясини, йирик ОАВ, технологик компаниялар ва «катта пулларни» сайловларга аралашишда айблади, деб хабар беради «Коммерсантъ».
«Агарда қонуний овозлар ҳисобланса, мен осонликча ғалаба қозонаман. Ноқонуний овозлар ҳисобланса… улар бизнинг сайловларимизни ўғирлашга уринмоқда», — дейди Трамп. Унинг таъкидлашича, почта орқали овоз бериш тизими одамларнинг табиатида бўлмаса ҳам уларни коррупцияга ундайди. Шунингдек, Трампнинг маълум қилишича, ижтимоий сўровларнинг ташкилотчилари сайловчиларни уйдан чиқмасдан овоз беришларини ўз олдига мақсад қилиб қўйган.
«Эндиликда барча тан олаётганидек, ОАВ ўтказган сўровлар катта таъсир доирага эга томонларнинг том маънода сайловларга аралашиши бўлган», — дея қайд этади Трамп.
У қатор ОАВда эълон қилинган сўровларни «сохта ва ёлғон» деб атаган. Трампнинг айтишича, айрим ОАВ номзодлар аслида деярли бир хил даражада кетаётган бир вақтда Байден етакчилик қилаётгани ҳақида ёзган.
Дональд Трампнинг сўзларига кўра, республикачилар Конгресснинг иккала палатасида ҳам муваффақиятга эришган. «Биз демократларга қараганда икки баробар кўпроқ жойни ҳимоя қилишга мажбур бўлган бўлсак-да, Сенатни сақлаб қолдик», — дейди Трамп Сенатдаги кўпчилик ҳали аниқланмаган бўлса ҳам.
Эслатиб ўтамиз, 5 ноябрь куни Трамп сайлов участкалари ёпилганидан кейин келиб тушган бюллетенларни санаш керак эмаслигини талаб қилиб, АҚШ президентлиги сайловида берилган овозларни санашни тўхтатишга чақирганди.
Аввалроқ Байден президентлик сайловларидаги ўзининг ғалабасига ишонишини маълум қилиб, сайлов натижаларини кутаётган америкаликлардан хотиржам бўлишни сўраган эди.
Изоҳ (0)