Санкт-Петербург ҳокимияти коронавирус тарқалишига қарши курашиш учун янги чоралар кўради. Тегишли фармонга шаҳар раҳбари Александр Беглов имзо чекди, дея хабар бермоқда «РБК».
Қайд этилишича, Санкт-Петербургда қуйидаги чекловлар жорий этилади:
- 9 ноябрдан 29 ноябргача умумий овқатланиш шохобчалари ишламайди. Темир йўл станциялари, ёқилғи қуйиш шохобчалари ва аэропортда жойлашганлари бундан мустасно;
- савдо марказларидаги болалар хоналари ёпилади;
- биноларда 70 дан ортиқ киши қатнашувидаги тадбирларини ўтказиш тақиқланади. Истиснолар спорт мажмуаларида ёки маданий объект бўлган биноларда бўлиб ўтадиган тадбирларда қўлланилади;
- никоҳни рўйхатдан ўтказишда рухсат этилган меҳмонлар сони 20 кишигача камайтирилади;
- қўшимча таълимга фақат масофавий форматда рухсат берилади;
- 9 ноябргача шаҳар маъмурияти ходимларнинг камида 30 фоизини масофадан ишлашга ўтказади.
Шунингдек, шаҳар аҳолисига бошқа вилоятларга ва чет элларга саёҳат қилишдан тийилиш тавсия қилинди.
Тезкор штаб маълумотларига кўра, сўнгги икки кун ичида Санкт-Петербургда кунига 1000 дан ортиқ коронавирусга чалинган одам аниқланди. 5 ноябрда яна 1093 кишида COVID-19 борлиги аниқланди. Бу пандемия бошланганидан бери янги анти-рекорд ҳисобланади.
Эслатиб ўтамиз, 2017 йилги маълумотларга кўра, Санкт-Петербургда 1 миллионга яқин Ўзбекистон фуқароси меҳнат қилади.
Жонс Ҳопкинс университети маълумотларига кўра, Россияда 1 699 695 та коронавирус билан боғлиқ ҳолат аниқланган. Беморларнинг 1 271 349 нафари соғайган, 29 285 нафари эса вафот этган.
Аввалроқ Грецияда умуммиллий карантин тартиби эълон қилинганди.
Изоҳ (0)