2 ноябрь куни Венада содир этилган теракт ишида ҳибсга олинганлар орасида Россия фуқаролари ҳам бор, деб ёзмоқда Meduza. Бу ҳақда Австрия пойтахти полицияси раҳбари Герхард Пюрстлга таяниб, Die Presse газетаси хабар берган.
Аввалроқ терактни тергов қилиш доирасида террорчилик ташкилотида иштирок этишда гумонланган 14 киши ҳибсга олингани маълум бўлган эди. Пюрстлнинг сўзларига кўра, улар 18 ёшдан 28 ёшгача бўлган шахслар бўлиб, уларнинг айримлари икки фуқароликка, жумладан, Бангладеш, Македония, Туркия ва Россия фуқаролигига эга.
Хабарда айтилишича, бундан аввал Россиянинг Австриядаги элчиси Дмитрий Любинский «Болқон мамлакатлари, Ислом дунёси ва Шимолий Кавказ»дан бўлганлар ҳибсга олингани ҳақида маълум қилган.
Ўз навбатида Австрия ички ишлар вазири Карл Нехаммер ҳозирча террорчи бир ўзи ҳаракат қилган, деган версия тасдиқланаётганини билдирган. Шунингдек, гумондор Словакияда ўқ-дорилар сотиб олишга ҳаракат қилгани, бу ҳақда Словакия махсус хизматлари Австрияни огоҳлантирганини ҳақида айтган. Нехаммер махсус хизматлар алоқасида «нимадир бўлиб» бу хабар эътиборсиз қолдирилганини тан олган.
Эслатиб ўтамиз, 2 ноябрь оқшомида содир бўлган Венадаги терактда беш киши ҳалок бўлган, 22 киши турли даражада жароҳат олган. Полиция ҳужум уюштирганлардан бирини отиб ўлдирган. У 20 ёшли Фейзулай Куйтим бўлиб, Сурияга кетиб, ИШИД террорчиларига қўшилмоқчи бўлгани учун 22 ойлик қамоқ жазосига ҳукм қилинган бироқ, муддатидан илгари шартли озод қилинган. ИШИД ушбу теракт учун масъулиятни ўз зиммасига олган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)