«Узоғи билан икки йилда тўлиқ лотин ёзувига ўтишимиз керак» – Иномжон Азимов кирилл-лотин муаммоси ҳақида

Давлат тилида иш юритиш асосларини ўқитиш ва малака ошириш маркази директори Иномжон Азимов Ўзбекистонда узоғи билан икки йилда тўлиқ лотин ёзувига ўтилишини маълум қилди, деб хабар беради «Kun.uz».

Иномжон Азимов журналистнинг лотин ёзувига тўлиқ, узил-кесил ўтиш жараёни қанча вақтни олиши тўғрисидаги саволга жавоб берган.

«Саволингиз жуда тўғри. Икки хил ёзувда юрган биздек давлат бирор ерда бўлмаса керак. Хоҳлаган жойингиз, хоҳлаган вазирлик ва ташкилотингизга боринг, ҳамма истаганини қиляпти. Бирор-бир мантиққа тўғри келмайди. Ҳар бир давлатнинг бир тўхтамга келган ёзуви бўлиши керак.

Фикримча, узоғи билан икки йилда биз тўлиқ, ҳамма соҳада лотин ёзувига ўтишимиз керак. Агар бу муддат юқорида айтганимиздек, яна чўзиладиган бўлса, кейин қийин бўлади.

Қўшнимиз Қозоғистонни кўринг, улар лотин ёзувига ўтамиз деб тайёргарлик кўришди ва ҳозир деярли ҳамма ташкилотлари бу ёзувга ўтиб бўлди», — дейди марказ директори.

Унинг сўзларига кўра, бу йўлда ёрдам берадиган куч бу – ОАВ. «Биринчи навбатда ОАВ мана мен деб чиқиши керак ва бизга ёрдам бериши керак. Улар шундай яхши ташаббус билан чиқиши керак», — дейди Азимов.

Шунингдек, Давлат тилида иш юритиш асосларини ўқитиш ва малака ошириш маркази директори учинчи хил ёзув ҳам пайдо бўлгани, бу ижтимоий тармоқ ёзувлари эканлигини қайд этиб ўтган. Азимовнинг таъкидлашича, бу ёзувни кирилл ёки лотин деб бўлмайди — иккови ҳам аралаш. Шу билан бирга, у ижтимоий тармоқлардаги канал, гуруҳларни юритаётганларни одамларга нимани ўргатаётгани ҳақида масъулият билан ўйлашга чақирган.

«Яна бир бор қайтараман, бизда бу борада ҳамма нарса тайёр ва ҳаммаси шундай кетса, балки бир йилда ҳам лотин ёзувига тўлиқ ўта оламиз. Буни кутиш керак эмас. Мана онлайн таълимга жуда узоқ тайёргарлик кўришди, лекин пандемия туфайли мажбур бўлинди ва тезда онлайн таълимга ўтилди», — дея қайд этади Иномжон Азимов.

Эслатиб ўтамиз, 2018 йил 15 майда «Лотин ёзувига асосланган ўзбек алифбосини кенг жорий этиш ва янада такомиллаштириш бўйича ҳаракатлар режаси» тасдиқланган ва режа бўйича йил охирига қадар аниқ таклиф берилиши лозим эди. Кейинроқ ўзбек алифбосига қандай ўзгаришлар киритилиши ҳам маълум бўлганди.