Туркистон–Чимкент–Тошкент йўналишида тезюрар темир йўл қурилиши мумкин

2 ноябрь куни бош вазири ўринбосари — инвестициялар ва ташқи савдо вазири Сардор Умурзоқов Қозоғистон бош вазири ўринбосари Роман Скляр билан учрашди. Бу ҳақда вазирлик матбуот хизмати хабар берди.

Таъкидланишича, учрашув чоғида инвестициявий, савдо-иқтисодий, саноат, транспорт ва логистика соҳаларида кўп қиррали ҳамкорликнинг бугунги ҳолати ҳамда уни янада мустаҳкамлаш ва кенгайтириш истиқболлари муҳокама қилинган.

Икки давлат раҳбарлари томонидан савдо айланмасини 10 миллиард долларга етказиш бўйича қўйилган вазифани фақат икки мамлакат тегишли вазирлик ва идораларининг ўзаро савдо, божхона қоидалари, стандартларини соддалаштириш ва мувофиқлаштириш, божхона ахборот тизимларини интеграциялаш, замонавий логистика марказлари қуриш, чегара пунктларини реконструкция қилиш, замонавийлаштириш бўйича комплекс чора-тадбирларни амалга оширишга қаратилган мувофиқлаштирилган ишларини олиб бориши орқали амалга ошириш мумкинлиги қайд этилган.

Бундан ташқари, Марказий Осиё Халқаро савдо-иқтисодий ҳамкорлик марказини (ХСИҲМ) яратиш бўйича биргаликдаги амалий ишларни давом эттириш тўғрисида келишувга эришилган.

«Томонлар Ўзбекистон ва Қозоғистон ўртасидаги Ҳудудлараро ҳамкорлик форуми ҳамда Ишбилармонлар кенгаши имкониятларидан фаол фойдаланиш, хусусий секторни икки томонлама иқтисодий ҳамкорликни кенгайтиришга фаол жалб қилиш ҳақида фикр билдирди», — дейилади хабарда.

Шунингдек, Ўзбекистон ва Қозоғистон йирик шаҳарлари ўртасида халқаро автобус қатновларини йўлга қўйиш, Туркистон–Чимкент–Тошкент тезюрар темир йўли ҳамда Учқудуқ–Қизилўрда транспорт йўлаги қурилиши муҳокама қилинган.

Учрашув якунлари бўйича ҳар икки мамлакат бош вазирлари ўринбосарлари якуний баённома, шунингдек, саноат кооперацияси соҳасида 22 та аниқ лойиҳаларни амалга оширишни таъминлашни назарда тутган Ўзбекистон ва Қозоғистон ўртасида ҳамкорликни кенгайтириш ҳамда чуқурлаштириш бўйича амалий чора-тадбирлар режасини («Йўл харитаси») қабул қилинган.

Аввалроқ бош вазир Абдулла Арипов Қозоғистон бош вазири ўринбосари Роман Скляр бошчилигидаги ҳукумат делегацияси вакилларини қабул қилгани ва томонлар  «тўсиқларни ечиш» ва акциз сиёсатини либераллаштириш масалаларини муҳокама қилгани тўғрисида хабар берилганди.