Фарғона вилояти Данғара туманида Мажбурий ижро бюроси (МИБ) йўл-транспорт ҳодисаси оқибатида вафот этган шахснинг қонуний вакилига моддий ва маънавий зарар учун судда белгиланган пул миқдорини ундириб берди. Бу ҳақда «Дарё»га МИБ хабар қилмоқда.
Маълум қилинишича, Мажбурий ижро бюроси Данғара туман бўлими иш юритувига 2020 йил 21 август куни жиноят ишлари бўйича Данғара туман судининг 2020 йил 3 июлдаги О.Эргашевга нисбатан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан чиқарилган ҳукм юзасидан фуқаровий даъвогар «Дeманд транс сервис» МЧЖдан жабрланувчининг қонуний вакили Э.Қодиров фойдасига 66 миллион 732 минг 616 сўм моддий ва 20 миллион сўм маънавий зарар ундириш ҳақидаги ижро ҳужжати келиб тушган.
Содир этилган йўл-транспорт ҳодисаси натижасида бир инсон вафот этган бўлсада моддий жавобгар шахс ҳисобланган «Деманд транс сервис» МЧЖ томонидан дастлабки тергов ва суд жараёнларида ҳам моддий зарар умуман тўлаб берилмагани аниқланган.
Суд ҳужжати бюронинг туман бўлимига келиб тушгандан кейин жавобгар «Деманд транс сервис» МЧЖнинг «Ҳамкор банк» Қўқон филиалидаги ҳисоб рақамига инкассо топшириқномаси қўйилгач, жамият мансабдор шахслари зарарни қоплаш ҳаракатига тушган.
Сўнгра 2020 йил 27 октябрда жавобгар тараф ундирувчи Э.Қодировнинг пластик картасига 66 миллион 732 минг 616 сўм моддий ва 20 миллион сўм маънавий зарар жами 86 миллион 732 минг сўм сўм пул маблағлари тўлиқ ўтказиб берди.
Ижро ҳужжати амалда тўлиқ ижро қилинганлиги сабабли тамомланиб, судга қайтарилди.
Аввалроқ МИБ фарғоналик тадбиркорнинг бузилган дўкони учун ҳокимиятдан 148 миллион сўм, Наманганда йўл-транспорт ҳодисаси жабрланувчисига 75 миллион сўм ва Тошкент шаҳрида 126 миллион сўмлик алимент пулини ундириб бергани ҳақида хабар берилганди.
Изоҳ (0)